Që në orën 09:00 të mëngjesit të gjitha ekipet e nevojshme të organeve të rendit dhe drejtësisë kishin dalë për hetime në Pejë, në vendin ku mbrëmjen e së mërkurës ndodhi një vrasje e dyfishtë.
Aty u vra kandidati i PDK-së për kryetar të Pejës, Astrit Ademaj, dhe ish-kandidati i PDK-së për kryetar të Deçanit, Blerand Kadrijaj.
Zëdhënësi i Prokurorisë së Pejës, Shkodran Nikçi, për shkak të ndjeshmërisë së rastit, nuk ka dhënë informata më të detajuara se cilat kanë qenë motivet.
“Janë sekuestruar dy armë dhe gëzhojat që dyshohet se janë përdorur për t’u kryer kjo vepër. Dy trupat e pajetë të viktimave janë dërguar me urdhër të prokurorit të shtetit për obduksion në institutin e mjekësisë ligjore dhe derisa të përfundojnë të gjitha veprimet hetimore për këtë çështje do të jemi të rezervuar”, ka deklaruar ai.
Në këtë ngjarje ka mbetur një person i plagosur, por nga Prokuroria nuk kanë treguar as se si ka ndodhur kjo dhe se a ka të tjerë të dyshuar.
Por, nga ajo që i është thënë KOHËS nga dëshmitarët, kuptohet se pas një mosmarrëveshjeje që kishin pasur ndërmjet vete, Blerand Kadrijaj kishte ardhur nga Deçani në Pejë dhe kishte shtënë mbi Astrit Ademajn, të cilin e kishte lënë të vdekur para lokaleve të shtëpisë së tij.
Më pas vëllai i Astritit, Avni Ademaj, i cili kishte marrë plagë nga arma gjithashtu, kishte shtënë mbi Kadrijajn duke e lënë pa shenja jete.
Pas ngjarjes së rëndë, i plagosuri Avni Ademaj ishte dërguar për mjekim në QKUK, ku edhe ishte intervistuar nga Policia.
I njëjti në orët e pasdites të së enjtes edhe është ndaluar nga Policia e Kosovës për 48 orë dhe ndaj tij është bërë kërkesa që t’i shqiptohet masa e paraburgimit.
Ekzaminimi i hetuesisë ka zgjatur me orë të tëra, sidomos në veturat e viktimave të cilat kishin qenë të shpuara nga plumbat.
Përveç familjes së ngushtë, të afërm të tjerë dhe mediat nuk janë lejuar që të afrohen afër shtëpisë së ish-kandidatit për kryetar të Pejës.
Gjatë ditës KOHA ka qëndruar edhe në fshatin Rastavicë të Deçanit, ku kishte nisur të mbahej e pamja për Blerand Kadrijajn, por familjarët kanë lutur që televizioni të mos marrë filmime për shkak të ndjeshmërisë së rastit.
Në shenjë nderimi dhe për dy zyrtarët e saj të vrarë, Partia Demokratike e Kosovës ka vendosur që të enjten të pezullojë të gjitha aktivitetet e saj politike anembanë vendit.
© KOHA. Të gjitha të drejtat janë të rezervuara.
