Dy fëmijë të moshave 12 e 13 vjeçe vdesin nga zjarri që ua kaploi shtëpinë
1
Shkallët që të dërgonin lart ishin mbushur me copëza të tavanit të djegur që tashmë i tëri kishte rënë në tokë.
I gjithë kati i kësaj shtëpie u shkrumbua, e bashkë me të u dogjën edhe dy fëmijë.
Flakët e zjarrit që shpërtheu mëngjesin e së mërkurës i zunë në gjumë një 12 e një 13- vjeçar.
Familjarët thonë se shtëpia u kaplua përnjëherësh nga flakët dhe nuk u dha atyre mundësi që t’u dilnin në ndihmë dy fëmijëve, që ishin djem të axhës ndërmjet vete.
Njëri prind që kishte rastisur në shtëpi, kishte bërë përpjekje për shpëtimin e tyre, por përveçse pa sukses, kishe pësuar edhe lëndime trupore, për çka ka marrë trajtim mjekësor.
Ndihmë nuk mundi t’u jepte as njësia e zjarrfikësve, dhe kufomat e tyre arritën të nxirren jashtë nga Forenzika, vetëm pasi u shua zjarri.
Por, kjo ngjarje tronditëse mezi po përballohet nga familjarët.
Teksa ka treguar se si ka ndodhur ngjarja, xhaxhai i dy viktimave thotë se nuk kanë dëgjuar kurrfarë përpjekje të fëmijëve për t’i shpëtuar zjarrit.
“Dikush prej familjes e ka parë si tym, diçka tym-tym në odë domethënë oda, Ne i kemi edhe shtëpitë matanë. Një kohë vetëm sa jemi afru, më nuk kemi pasur shans të afrohemi aty, d.m.th. e ka kaplu tymi e flaka. Prej asaj pjese jam ardhë qeshtu, i kam thy qeto dritaret se atje ka qenë më.. dhe kur i kom thy dritaret atëherë ka kapluar”, tha xhaxhai i viktimave, Bashkim Sadrija.
Shkaqet që e kanë shkaktuar këtë zjarr janë ende të panjohura për Policinë e Kosovës.
DEK: Milazim Lumi, Komandant i Policisë në Rajonin e Gjakovës
“Njësitë relevante pos Policisë, njësite të KEDS-it dhe zjarrfikësve, ekspertë të zjarrit, janë në terren dhe po punojnë në identifikimin e shkaqeve se si ka ndodhur ky zjarr”, tha Milazim Lumi, komandant i Policisë në rajonin e Gjakovës.
Ndonëse Policia nuk ka mundur të tregojë për arsyet që e kanë shkaktuar zjarrin, familjarët thonë se zjarri mund të jetë shkaktuar nga një shtyllë elektrike që ka qëlluar të jetë shumë afër shtëpisë, e për të cilën thonë se e kanë lajmëruar KEDS-in, por që nuk kanë marrë masa.
Për këtë çështje KOHA ka kontaktuar edhe zyrtarë të KEDS-it, të cilët kanë thënë se janë duke i analizuar detajet.
“Të nderuar, KEDS-i ka dërguar një ekip të ekspertëve që do të analizojë secilin detaj çka ka ndodhur. Ne i lusim të gjitha palët që të përmbahen derisa të përpilohet raporti i ekspertëve bazuar në gjetjet në vendin e ngjarjes. Në pamje të parë, as shtylla, as kablloja që e furnizon shtëpinë nuk janë as të djegura, as të dëmtuara. Për shkak të ndjeshmërisë së rastit, KEDS nuk mund të komentojë diçka tjetër”, thuhet nga KEDS-i.
Dy fëmijët e vdekur janë kujtuar si të sjellshëm dhe të urtë nga drejtori i shkollës së tyre.
