Megjithëse ditëve të fundit ka nisur të bjerë numri i të infektuarve, shqetësues mbetet numri i të vdekurve nga koronavirusi.
28 persona kanë humbur betejën me COVID-19, njëri prej tyre i grupmoshave 20-29 vjeç.
Në 24 orët e fundit janë regjistruar 489 raste të reja, por janë kryer dukshëm teste më pak, vetëm 6300 sosh.
Në klinikat COVID në QKUK dhe në spitalet e përgjithshme rajonale janë duke u trajtuar 1233 pacientë.
Prej tyre 1038 janë me oksigjenoterapi e 83 në gjendje të rënduar shëndetësore.
Ndërsa, 16 gra shtatzëna po trajtohen në Klinikën e Gjinekologjisë për gjendjen e të cilave ka njoftuar drejtori i kësaj klinike.
“Aktualisht sot në mëngjes janë të hospitalizuara 16 paciente me COVID. 6 prej tyre janë me oksigjenoterapi, një prej tyre është në gjendje pak më të rënduar ndërsa të tjerat në gjendje stabile”, ka deklaruar drejtori i Klinikës Gjinekologjike, Jakup Ismaili.
Krahas numrit të lartë të vdekjeve dhe të të infektuarve me COVID-19, po vazhdon edhe procesi i vaksinimit.
Që nga fillimi i procesit e deri më sot, në nivel vendi janë administruar rreth 920 mijë vaksina.
Prej tyre 615 mijë qytetarë janë të vaksinuar vetëm me dozën e parë, ndërsa 307 mijë të tjerë janë të vaksinuar me të dyja dozat.
“Në të parën kom pas probleme, kom pas kokëdhembje, lodhje. Nja 4 ditë nuk kam qenë mirë. Procesi sot shkoi shumë mirë, s’kam prit asnjë minutë. U tregova për të kaluarën, më thanë ‘besojmë këtë radhë s’ke me pas”, ka thënë Sabrije Llapashtica, qytetare.
Kosova tashmë e ka zgjidhur edhe problemin me vaksina, pasi të hënën ka pranuar mbi gjysmë milioni vaksina nga SHBA-ja.
Ministria e Shëndetësisë po ashtu ka njoftuar se kanë arritur edhe 53 mijë doza të tjera që janë nga marrëveshja bilaterale për vaksina kundër COVID-19 të kompanisë Pfizer.
“Me arritjen e këtyre vaksinave dhe atyre që MSh-ja i ka në stok, procesi i vaksinimit në masë kundër COVID-19 do të fuqizohet edhe më tej, me qëllim të arritjes së objektivit të Qeverisë së Republikës së Kosovës për vaksinimin e 60% të popullatës sipas Planit shtetëror të vaksinimit”, thuhet në njoftim.
MSH-ja ka ripërsëritur thirrjen për vaksinim sidomos për grupmoshat mbi 16 dhe 12-vjeç.
© KOHA. Të gjitha të drejtat janë të rezervuara.
