Një foshnjë 3-javëshe është mbase viktima më e re nga COVID-19 në Kosovë. Foshnja vdiq të shtunën mbrëma, ndërkohë që kishte ditë që ajo po trajtohej me ventilim mekanik në Njësitin Covid në Klinikën e Neonatalogjisë, ku ishte shtruar në gjendje të rënduar shëndetësore.
Komplikimeve si pasojë e COVID-19 nuk u mbijetoi edhe një lehonë, ndërkohë që sipas raportit të së dielës të Ministrisë së Shëndetësisë, në 24 orët e fundit janë shënuar 24 viktima nga kjo sëmundje.
Drejtoresha e Klinikës së Neonatologjisë, Hajrie Ismaili, ka thënë për KOHËS se foshnja nuk kishte lindur me COVID, por atë e kishte marrë nga familja. "Fatkeqësisht, mbrëmë ka vdekur një foshnjë 3-javëshe. Nga dita e pranimit ka qenë në gjendje të rëndë. Foshnja nuk ka lindur me koronavirus, por në bazë të anamnezës, e gjithë familja ka qenë e prekur me COVID-19”, ka thënë Ismaili të dielën.
Ndërkohë, lehona e vdekur ishte 26-vjeçare nga Vitia. Ajo ka vdekur në orët e hershme të mëngjesit të së dielës në Njësinë Intensive Qendrore të QKUK-së.
Mjeku kujdestar, Gazmend Spahija, ka thënë se viktima ishte shtruar në Intensivë menjëherë pasi kishte lindur foshnjën.
“Rreth orës 02:30 të ditës së diel, pacientja e lindur në vitin 1995 ka vdekur nga COVID-19. Ajo i ishte nënshtruar operimit cezarian për kryerjen e lindjes, mirëpo për shkak të gjendjes së rënduar, pasi ka pasur dëmtim të madh të mushkërive, është sjellë në mjekim intensiv”, ka thënë Spahija.
Ajo është bërë viktima e 6 në mesin e lehonave dhe shtatzënave që brenda një jave kanë vdekur nga virusi.
Të dielën në Kosovë janë shënuar edhe 890 raste të reja me COVID-19, derisa klinikat e QKUK-së dhe Spitalet Rajonale janë stërmbushur me pacientë të prekur nga kjo sëmundje.
Aktualisht të hospitalizuar janë 1.207 pacientë, prej tyre 1.026 me oksigjeno-terapi dhe 87 në kujdes intensiv mjekësor që shënon shifër rekorde të të shtruarve në këtë njësi. Spitali i Pejës është prej më të ngarkuarve me 220 pacientë të shtrirë. Tashmë në dispozicion është vënë edhe salla e takimeve dhe korridori.
Drejtori i Klinikës Infektive, Arben Vishaj, ka bërë thirrje që të shtohen kapacitetet e hospitalizomit, në mënyrë që Kosova të mos jetë e papërgatitur në rast se arrijnë edhe variantet e reja të COVID-19.
“Është e mundshme që të vijnë edhe variante të reja, sepse ne nuk mund të prognozojmë asgjë për gjenetikën e këtij virusi, për aftësitë e tij për t’u transformuar. Për variantet e reja ne nuk mund të predikojmë a do të jenë më të ashpra, por në të gjitha rrethanat sistemi shëndetësor duhet të vazhdojë të përsoset në mënyrë që prurjet e reja me pacientë shumtë t’i përballojnë më lehtë”, ka thënë Vishaj.
E për mundësinë e prezencës së varianteve të reja në Kosovë, as nga Ministria e Shëndetësisë e as nga IKSHPK-ja nuk kanë kthyer përgjigje gjatë së dielës.
Sipas të dhënave të Ministrisë së Shëndetësisë, brenda 24 orëve të fundit janë administruar 19.526 doza të vaksinës. Deri më tani numri i të vaksinuarve me dozën e parë ka shkuar në 615 mijë, ndërsa i atyre më të dyja dozat në 307 mijë.
Doktorët vazhdojnë po bëjnë thirrje për vaksinim, meqë sipas tyre, kjo është forma më e lehtë për ta kaluar virusin.
Vishaj ka thënë se pacientët që janë imunizuar me vaksinën anti-COVID, i përballojnë më lehtë manifestimet klinike.
“Diku mbi 90% të pacientëve të trajtuar në Klinikën Infektive janë të pavaksinuar, 10% janë të vaksinuar. Mirëpo, te pacientët që janë të vaksinuar manifestimet klinike janë më lehtë të përballueshme dhe këta pacientë nuk janë duke manifestuar formën shumë të rëndë dhe fatale, por janë duke manifestuar manifestime klinike mesatarisht edhe të rënda”, ka deklaruar Vishaj.
Në 24 orët e fundit janë shëruar 1.712 persona, ndërsa raste aktive janë mbi 25 mijë.
© KOHA. Të gjitha të drejtat janë të rezervuara.
