Proces paralel dhe të dëmshëm vazhdon ta konsiderojë partia në pushtet iniciativën “Ballkani i Hapur”.
Shefja e deputetëve të Lëvizjes Vetëvendosje, Mimoza Kusari-Lila, ka thënë se me kryeministrin e Shqipërisë, Edi Rama, nuk bisedojnë lidhur me temën e Minishengenit, që tani ka ndryshuar emrin.
“E kemi konsideruar si një proces, e para, paralel, dhe, e dyta, të dëmshëm, në momentin kur Serbia bëhet bosht i një iniciative siç është rasti me Minishengen ose ‘Open Balkan’, ndërsa së dyti konsiderojmë që fokus duhet t’i jepen shumë më shumë pengesave të deritanishme që janë bërë sesa iluzioneve që mund të ndryshojë i njëjti shtet në raport me ne ose në raport me të tjerët në Ballkan dhe nuk jemi i vetmi shtet që e refuzon ‘Open Balkan’. Prandaj nuk mund të quhet si i tillë përderisa tri nga gjashtë shtetet e Ballkanit Perëndimor e kundërshtojmë një iniciativë të tillë”, ka thënë ajo.
Megjithatë, Kusari-Lila ka deklaruar pas mbledhjes së kryesisë se raportet me Shqipërinë mbesin të pakontestueshme, pavarësisht politikave ditore.
“Çkado që mund të jenë nismat apo politikat ditore, raportet e Kosovës me Shqipërinë mbeten të pakontestueshme, raportet më të veçanta për qytetarët e Republikës së Kosovës. Me kryeministrin Rama aktualisht, iniciativën të cilën njëanshëm ai e filloi me Serbinë dhe Maqedoninë e Veriut, natyrisht që do të vazhdohet biseda por jo në këtë temë dhe jo për shtetet e kësaj ideje të cilën e thashë edhe një herë, pa dallime në Kosovë e kanë kundërshtuar”, ka shtuar Kusari-Lila.
Në Forumin Ekonomik për Bashkëpunim Rajonal në Shkup, kryeministri i Maqedonisë së Veriut, Serbisë dhe Shqipërisë u pajtuan që nisma të emërtohet “Open Balkan”.
Përmes një shkrimi të publikuar në mediat maqedonase, kryeministri Zoran Zaev ka folur për përfitimet e kësaj nisme, teksa u ka bërë thirrje edhe vendeve tjera të bëhen pjesë e saj.
“Shikoni perspektivat - së bashku ne mund të bëjmë shumë më tepër, dhe popujt tanë e dinë se si, dhe duan të bashkohen për një të sotme më të mirë dhe një të nesërme më të mirë. Ky është mesazhi im për udhëheqjet në Kosovë, Bosnjë-Hercegovinë dhe Mal të Zi, sa më shpejt t’i shohim këto perspektiva të përbashkëta, aq më mirë për popujt tanë. Nisma është e hapur dhe ua zgjat dorën të gjitha vendeve të Ballkanit Perëndimor. ‘Bashkohuni, për hir të popujve tanë!’”, ka shkruar mes tjerash Zaev.
Përveç Kosovës, nisma është refuzuar edhe nga Mali e Zi dhe Bosnjë-Hercegovina.
Ndërkaq Kryeministri i Shqipërisë, Edi Rama, në konferencën e përbashkët kishte deklaruar se vendet nuk duhet të mbesin peng i së kaluarës.
Shqipëria, Maqedonia e Veriut dhe Serbia kanë nënshkruar në fund të Forumit për Bashkëpunim Ekonim Rajonal të mbajtur më 29 korrik një marrëveshje e dy memorandume.
Marrëveshja ka të bëjë me rastet e katastrofave natyrore për gatishmëri për të mbështetur shtetet, për ndihmë të ndërsjellët.
Janë nënshkruar edhe dy memorandume mirëkuptimi. I pari ka të bëjë me lehtësimin e importit e të eksportit, pastaj për eliminim të barrierave në kufij e për përmirësim të bashkëpunimit ekonomik.
Memorandumi tjetër ka të bëjë me tregun e fuqisë së punës, se si të lehtësohet qarkullimi i njerëzve, të lehtësohet procesi i dhënies së lejeve të punës për qëndrim të përkohshëm.
© KOHA. Të gjitha të drejtat janë të rezervuara.
