Telekomi i Kosovës ia paguan nga 125 mijë euro në muaj Monako Telekomit, shkaku i moszbatimit në tërësi të kodit shtetëror.
Gjatë raportimit në Komisionin për Mbikëqyrjen e Financave, për Raportin e Auditorit për këtë ndërmarrje, përfaqësuesit e ndërmarrjes kanë thënë se nuk kanë pasur mjete për implementimin e kodit, i cili do të kushtonte rreth 3 milionë e 300 mijë euro.
Por, vetëm gjatë vitit 2019 dhe 2020 kjo ndërmarrje i kishte paguar 3 milionë e 960 mijë euro për shërbime të marra nga Monako.
“Po konsiderojmë se me një investim në kod shtetëror, ne kishim mujt brenda 1 viti e gjysmë me i nxjerrë këto pare, dhe plus me na mbet kodi shtetëror. Mirëpo, investimet janë në vlera milionëshe, gjë që Telekomi i Kosovës nuk mundet vetë me e ba”, KA DEKLARUAR Burbuqe Hana, u.d. e kryeshefes ekzekutive të Telekomit.
Ajo është çuditur se si deputetët nuk janë të informuar që Telekomi e paguan Monako Telekomin për shërbime.
Deputeti i Vetëvendosjes, Enver Haliti, ka thënë se ka qenë i informuar për mosimplementim të kodit, por ka pyetur se pse ka ndodhur kjo.
“Më interesoj diçka, sepse m’u duk pak jorelevante nëse i paguan Telekomi 1.9 milionë euro vjetore Monaco Telekomit, ndërsa duhen 3.2 milionë euro investime që të realizohet 100 për qind. A asnjëherë nuk e ka parë të arsyeshme Qeveria të investojë 3.2 milionë euro për realizimin e kodit shtetëror?”, ka thënë Haliti.
Deputeti Eman Rrahmani ka kërkuar sqarime nëse janë paguar punëtorë pa ardhur në punë, dhe se a ka pasur raste kur një zyrtar ka bërë marrëveshje me fëmijën e tij 12-vjeçar për vendosjen e antenës.
“Sa raste janë, të cilët nuk kanë ardhur asnjëherë në punë dhe çfarë keni ndërmarrë për këto raste”, ka pohuar Rrahmani.
Për këtë, kryeshefja Hana ka thënë se ka pasur kontrata me fëmijë.
“Ka pasur kontrata me fëmijë. Jam e njoftume dhe dihet saktësisht ku janë dhe qysh janë. Nuk janë trajtuar, po natyrisht se kanë me u trajtuar dhe asgjë s’ka me flejt... Për punëtorët që nuk vijnë në punë ka qenë një problem që më vonë jam njoftuar, është që kishte qenë ‘VIP lista’ e që ka pasur njerëz që iu është lejuar mos me u nënshkruar”, ka shtuar Hana.
Deputetët kanë shprehur shqetësim edhe për shërbimet jocilësore të Telekomit dhe për borxhet që kjo ndërmarrje ka. Për këtë, drejtues të Telekomit kanë thënë se kanë përgatitur një plan për daljen nga kjo situatë.
© KOHA. Të gjitha të drejtat janë të rezervuara.
