26 persona të cilët u lënduan në aksidentin e një ditë më parë, sipas Ministrisë së Punëve të Jashtme e Diasporës, janë në procesin e lirimit. Sipas kësaj Ministrie, trajtimin mjekësor në spital do ta vazhdojnë 15 persona të tjerë, gjendja shëndetësore e të cilëve është stabile, derisa vetëm një rast është në gjendje më të rëndë.
“Ministria e Punëve të Jashtme dhe Diasporës (MPJD), nga komunikimi me autoritetet kroate përmes ambasadës së Kosovës në Zagreb, lidhur me gjendjen e bashkatdhetarëve të aksidentuar dje në Sllavonski Brod, njofton opinionin publik se nga të dhënat e konfirmuara deri në orën 14:00, janë 26 persona në proces të lirimit nga spitali”, thuhet në njoftimin e Ministrisë së Punëve të Jashtme e Diasporës.
Ndërsa autoritetet kroate do të vendosin mëngjesin e së martës, për masën e paraburgimit, për shoferin që voziste autobusin që u aksidentua të dielën në Slavonski Brod të Kroacisë.
Ai këtë të hënë është dërguar para Prokurorisë së Qarkut, ku sipas avokatit të tij, është mbrojtur në heshtje. Shoferi i dyshuar akuzohet për veprën penale ‘’Shkaktimi i aksidentit të trafikut në rrugë’’.
Dënimi maksimal për këtë vepër me ligjet e Kroacisë është nga gjashtë muaj deri në 15 vjet. Siç u raportua, shoferin e zuri gjumi për një moment dhe autobusi që po bartte mërgimtarë nga Kosova devijoi nga rruga, duke lënë të vdekur 10 persona dhe mbi 40 të lënduar.
E pas qëndrimit disa orësh në Kroaci, kryeministri i Kosovës, Albin Kurti është kthyer të martën në Kosovë. Por, më të nuk u kthyen edhe ministri i Shëndetësisë, Arben Vitia e ai i Punëve të Brendshme, Xhelal Sveqla.
Kurti mbrëmjen e së hënës, arriti në qytetin Sllavonski Brod në Kroaci, ku edhe falënderoi autoritetet kroate për punën e bërë për të ndihmuar të aksidentuarit.
Ndërsa Presidentja Vjosa Osmani, e cila ndërpreu vizitën e në Japoni, pritet që të mërkurën të kthehet në Kosovë. Të dielën në afërsi të Slavonski Brod u aksidentua autobusi i linjës Frankfurt – Prishtinë dhe si pasojë vdiqën dhjetë persona.
© KOHA. Të gjitha të drejtat janë të rezervuara.
