Thirrjet për t’u vaksinuar kundër COVID-19 janë shtuar ditëve të fundit për shkak të rrezikut nga varianti Delta. Instituti Kombëtar i Shëndetit Publik, nëpërmjet rrjeteve sociale, ka tërhequr vërejtjen se mosvaksinimi përkeqëson situatën me pandeminë, rrit rastet e infektimeve e mbingarkon sistemin shëndetësor.
“Mos lejoni mbylljen e të gjithëve nga pakujdesia e disave! Kudo që hasni persona që nuk janë vaksinuar, i këshilloni të vaksinohen për të ruajtur shëndetin e tyre dhe të të afërmve të tyre”, shkruhet në statusin e IKSHPK-së.
Të njëjtën e thonë edhe nga Ministria e Shëndetësisë, të cilët tregojnë se ka interesim të madh nga qytetarët për t’u vaksinuar. Sipas zëdhënësit të MSH-së, Faik Hoti, Kosova në stok ka vaksina të mjaftueshme, derisa ka treguar se ditët në vazhdim priten edhe kontingjente të tjerë. Ai tutje ka shtuar se të gjithë duhet t’i përgjigjen thirrjes për vaksinim.
“Tani kemi një situatë të qetë epidemiologjike, mirëpo po shohim në vendet e rajonit, madje edhe në vendin tonë dje është shënuar një ngritje e rasteve që mund të jetë e ndërlidhur me variantin Delta”, ka shtuar ai.
Më 29 qershor të këtij viti, Kosova ka konfirmuar dy rastet e para me variantin Delta, apo të njohur edhe si varianti indian, i cili edhe shpërndahet më shpejt sesa të gjitha mutacionet e tjera të COVID-19. Sipas zëdhënësit Hoti, nuk ka informacione nëse janë dërguar mostra të tjera jashtë vendit për testim për këtë variant.
“Për informata më specifike duhet të pyetet Instituti”, ka thënë ai.
Për shkak të mospasjes së kapaciteteve për testim të mostrave për këtë variant, IKSHPK-ja kishte dërguar 22 mostra në një laborator në Berlin.
Hoti tutje ka thënë se qendrat e vaksinimit varësisht prej nevojës dhe terminëve të caktuar nga qytetarët, ekipet e vaksinimit punojnë edhe gjatë vikendit.
Salla “1 Tetori” në Prishtinë edhe këtë të premte ishte e mbushur me qytetarë të shumtë që prisnin për t’u vaksinuar. Shefki Maqedonci kishte ardhur për të marrë dozën e dytë të vaksinës dhe kishte një mesazh për të gjithë.
“Mesazhi im është që sa më shumë të vaksinohen, sepse kjo vaksinë është e sigurt”, thotë ai.
Edhe Gani Maqedonci, banor i kryeqytetit, thotë se nuk ka pasur asnjë problem kur e ka marrë dozën e parë të vaksinës.
“Na kemi ardhur me marr të dytën. Të parën e kemi marrë, mirë kemi kalu e s’na ka mundu. Këto duhet me i marrë i gjithë populli jo me thanë ashtu-kështu”.
Në Kosovë deri tani, numri i të vaksinuarve kundër COVID-19 ka arritur në mbi 340 mijë, prej tyre mbi 100 mijë kanë marrë të dyja dozat.
Meritat për këtë numër të vaksinave të administruara e për menaxhimin e situatës me pandeminë, kryeministri i Kosovës, Albin Kurti, ia ka dedikuar qeverisjes së tij.
Ai përmes një statusi në “Facebook” ka thënë se kur kanë pranuar detyrën, situata me pandeminë ishte e rënduar, derisa sipas tij, tashmë e kanë vënë nën kontroll dhe situata është përmirësuar.
“Pas përpjekjeve të përbashkëta, sot në Republikën tonë janë vetëm 126 raste aktive nga 12.808 sosh sa ishin në ditën e parë të punës sonë. Pra, pandemia është vënë nën kontroll dhe situata është përmirësuar dukshëm. Por, tani rrezikohemi nga përhapja e variantit Delta të virusit. Përballë tij mburoja për secilin prej nesh është vaksina, kurse për të gjithë së bashku vaksinimi masiv”, ka shkruar Kurti në rrjetin social “Facebook”.
© KOHA. Të gjitha të drejtat janë të rezervuara.
