Me gjithë rrezikun nga varianti Delta, Qeveria lehtëson masat
1
Derisa shumë shtete kanë rikthyer disa nga masat kufizuese, për shkak të rrezikut me variantin Delta, Qeveria e Kosovës u ka hapur rrugë hapjes së klubeve të natës e zgjatjes së orarit për gastronomet. IKSHPK-ja e MSH-ja nuk kanë treguar nëse kanë dërguar mostra për testim jashtë vendit për variantin Delta.
Me gjithë rrezikun e përhapjes së varianteve të reja të koronavirusit, Qeveria e Kosovës këtë të mërkurë ka vendosur që të lirojë edhe më tutje masat anti-COVID. Ekzekutivi vetëm ka vendosur që t’ua ndalojë hyrjen personave që e kanë vizituar Indinë, Brazilin e Afrikën e Jugut, përveç shtetasve të Kosovës, e të cilët duhet të karantinohen për 14 ditë.
Por hapja e klubeve të natës e zgjatja e orarit për ahengjet familjare deri në orën 1:00 pas mesnate e me 300 të ftuar, janë vetëm disa nga lehtësimet e radhës që i ka ndërmarrë ekzekutivi, pas presioneve nga bizneset.
Më 29 qershor, Kosova i regjistroi dy raste me variantin Delta të koronavirusit, apo i njohur si varianti indian, i cili po përhapet me shpejtësi në mbarë botën. Analizat për këtë variant ishin bërë në Berlin të Gjermanisë, si shkak i mospasjes së kapaciteteve për këtë test në vend.
As Instituti Kombëtar i Shëndetit Publik e as Ministria e Shëndetësisë nuk janë përgjigjur nëse kanë dërguar ndonjë mostër tjetër jashtë vendit.
Në anën tjetër, që nga 1 e deri më 12 korrik, sipas statistikave të Policisë së Kosovës, në Kosovë kanë hyrë mbi 516 mijë qytetarë nga vende të ndryshme, përmes Aeroportit Ndërkombëtar të Prishtinës e pikave kufitare.
Varianti Delta i koronavirusit është shfaqur në Indi, në tetor të vitit 2020. Organizata Botërore e Shëndetësisë e ka shpallur atë “variant shqetësues” në muajin maj.
Në anën tjetër, fluks i qytetarëve u pa në sallën “1 Tetori” për ta marrë vaksinën. Nga kjo e martë të gjithë personat mbi moshën 18-vjeçare mund të vaksinohen.
Derisa vetëm në 24 orët e fundit, në Kosovë janë vaksinuar mbi 11 mijë qytetarë. Sipas njoftimit të Ministrisë së Shëndetësisë, gjatë kësaj kohe nuk është regjistruar asnjë rast i vdekjes, e janë konfirmuar edhe 12 raste të reja me COVID-19.
