Me akuza të shumta ndaj Bashkimit Evropian e kundërshtime mes kryeministrit të Kosovës, Albin Kurti, e liderëve të rajonit është karakterizuar konferenca ndërkombëtare “Forumi i Prespës për Dialog”, i mbajtur në Ohër këtë të premte.
Derisa kryeministrat e Shqipërisë, Serbisë e Maqedonisë renditën kritika ndaj politikës së Bashkimit Evropian ndaj vendeve të Ballkanit Perëndimor dhe theksuan rëndësinë e bashkëpunimit rajonal përmes iniciativës së Mini-Shengenit, kryeministri i Kosovës, Albin Kurti, kërkoi që të mos nguten me vendime të tilla. E pikërisht kjo iniciativë mori vëmendjen kryesore në diskutimin e bërë mes liderëve të rajonit, ndonëse tema e diskutimit lidhej kryesisht me bashkëpunimin mes Bashkimit Evropian dhe Amerikës e integrimin transatlantik të vendeve të Ballkanit Perëndimor.
Në fjalën e tij, kryeministri i Kosovës, Albin Kurti, tha se nuk e përkrahin Mini-Shengenin – pasi, sipas tij, nuk ka të bëjë me vizionin për rajonin – dhe bëri thirrje që të punohet në integrimin në Bashkimin Evropian.
“Ajo që nuk duhet të bëjmë është t’u ikim përgjegjësive tona me veprime që në fund krijojnë edhe më shumë konfuzion mes nesh dhe u japin mundësi palëve të tjera që t’i shfrytëzojnë. Kështu është edhe ideja e Novi Sadit, për atë që quhet Mini-Shengen, ajo është një iniciativë që nuk ka vizion për rajonin dhe si të tillë Republikën e Kosovës e refuzon ashpër”, tha Kurti.
Duke iu referuar Serbisë, Kurti tha që nuk duhet të lejohet që pakënaqësia ndaj BE-së “të instrumentalizohet nga vendet të cilat nuk e duan NATO-n, apo e mbështesin Federatën e Rusisë”.
Deklaratës lidhur me NATO-n i parapriu fjalimin i homologes së tij nga Serbia, Ana Bërnabiq. Kryeministrja e Serbisë tha se për dallim nga vendet e tjera të Ballkanit Perëndimor, nuk janë të interesuar për integrimin transatlantik.
“Serbia është vend i cili angazhohet për integrim evropian, jo për integrim euroatlantik. Në këtë kontekst dallohemi nga vendet e tjera, përveç Bosnjë-Hercegovinës. Ne dëshirojmë të përfshihemi në Bashkim Evropian, por jo edhe NATO, të jemi ushtarakisht neutralë dhe të angazhohemi për neutralitet ushtarak”, tha ajo.
Shefja e Qeverisë së Serbisë tha se vendet e rajonit duhet t’i vazhdojnë aktivitetet e bashkëpunimit rajonal. Derisa përmendi dialogun me Kosovën, proces të cilin e cilësoi si të ndërlikuar, Bërnabiq bëri thirrje që për interesa të qytetarëve të të gjithë rajonit të lihet anash politika e të punohet për përmirësimin e jetës së tyre. Duke iu referuar heqjes së roamingut, kryeministrja e Serbisë tha se ka shumë gjëra që mund të bëjnë për qytetarët e tyre.
I ashpër ndaj Bashkimit Evropian e insistues në realizimin e Mini-Shengenit, në panelin e diskutimit në kuadër të Forumit të Prespës, ishte kryeministri i Shqipërisë, Edi Rama. Përderisa nuk mund të bëjnë asgjë për anëtarësimin në Bashkimin Evropian, përveç reformave që duhet të ndërmarrin, sipas Ramës, është në duar të vendeve të rajonit që të lehtësojnë jetën e qytetarëve.
“Pse duhet të presim të presim të bëhemi anëtarë të BE-së që të bëjmë tregti dhe ajo të rrjedhë pa barriera, pa pritje? Pse duhet ta presim BE-në të bëhemi pjesë e BE-së, që të kemi lëvizje të lirë të njerëzve, me letërnjoftim, që të kemi qarkullim të njerëzve, kapitalit dhe mallrave? Të kemi sistemin, një sportel në kufi dhe t’i shndërrojmë kufijtë të hapur dhe të lirë për njerëzit tanë”, tha Rama.
Moshapja e negociatave për anëtarësimin në BE të Shqipërisë e Maqedonisë së Veriut, kryeministri Zoran Zaev tha se është mesazh i keq për rajonin. Sipas tij, një gjë e tillë i ka dëshpëruar të dyja vendet dhe ka treguar dështimin e BE-së në politikën e vet të zgjerimit.
“BE-ja nuk e përmbushi premtimin. Si kryeministër them se BE-ja mund të vendosë biseda dhe data, afate të fundit, por BE-ja nuk mund ta përcaktojë lokacionin tonë dhe kjo do të thotë se jemi në qendër, në zemër të Evropës”, tha ai.
Në kuadër të Forumit të Prespës, kryeministri Albin Kurti, i shoqëruar nga ministrja e Punëve të Jashtme, Donika Gërvalla, është takuar edhe me emisarin e BE-së për dialogun me Serbinë, Miroslav Lajçak, e zyrtarë të tjerë të Bashkimit Evropian, derisa nga Qeveria e Kosovës nuk është dhënë ndonjë informatë më shumë lidhur me temat e diskutimit.
Kurti, gjatë qëndrimit në Ohër e para fillimit të diskutimit, është takuar edhe me eurodeputeten sllovene, Tanja Fajon, ish-eurodeputetin gjerman, Knut Fleckenstein, kryeministrin e Shqipërisë̈, Edi Rama, zëvendëskryeministrin e Maqedonisë së Veriut, Artan Grubin, dhe kryetarin e Bashkimit Demokratik për Integrim, Ali Ahmeti.
Legjenda: Në fjalën e tij të mbajtur në kuadër të Forumit të Prespës,kryeministri i Kosovës, Albin Kurti, tha se nuk e përkrahin Mini-Shengenin – pasi, sipas tij, nuk ka të bëjë me vizionin për rajonin – dhe bëri thirrje që të punohet në integrimin në Bashkimin Evropian
© KOHA. Të gjitha të drejtat janë të rezervuara.
