Faza paragjyqësore ndaj Pjetër Shalës i akuzuar nga Gjykata Speciale, pritet të përfundojë në gjysmën e dytë të nëntorit të këtij viti.
Për dallim nga rastet e tjera të të arrestuarve në Hagë, mbrojtja e Shalës dhe përfaqësuesit e Zyrës së Prokurorit të Specializuar kanë komunikim normal, pa kritikuar njëri-tjetrin.
Në seancën paragjyqësore të mbajtur të hënën u diskutuan kryesisht çështje teknike.
Avokati që e përfaqëson Shalën, Jean-Louis Gilissen, ka thënë se dëshiron të theksojë nivelin e lartë të marrëdhënies profesionale mes mbrojtjes e prokurorisë, duke e konsideruar të cilësisë më të lartë.
“Procesi i nxjerrjes së materialeve sipas rregullës 102 (1) (a) është zhvilluar pa probleme. Nxjerrjet e materialeve sipas kësaj rregulle janë plotësuar, por kolegu ra dakord të na japë disa video-incizime që lidhen me të akuzuarin. Ne i kemi bërë disa ngarkesa tona ZPS-së dhe jemi duke diskutuar me ta rregullisht me qëllim të përcaktimit të dokumenteve, dëshmive të caktuara që i konsiderojmë të nevojshme për t’i kuptuar më mirë materialet e nxjerra përpara. Presim të vazhdojmë këtë bashkëpunim konstruktiv me ZPS-në”, ka deklaruar Jean-Louis Gilissen, avokat i Pjetër Shalës.
Prokuroria ende është duke bërë hetime, por besojnë që deri më 30 korrik do t’i përmbyllin ato.
Prej arrestimit të Shalës, por edhe të akuzuarve të tjerë që po mbahen në Hagë për krime lufte, askush nga familjarët e tyre nuk ka mundur t’i vizitojë ata.
Por një gjë e tillë, sipas administratores Fidelma Donlon, do të ndryshojë së shpejti.
“Është synimi ynë që nga data 15 korrik të lejojmë vizita fizike të familjarëve në objektin e paraburgimit. Do të kemi mundësi që të lejojmë edhe takime fizike ndërmjet të pandehurve dhe mbrojtjes së tyre. Deri tani takimet me familjarët janë organizuar përmes “Zoom” dhe jemi munduar të krijojmë të gjitha kushtet e nevojshme për t’u takuar mbrojtja me të akuzuarit”, la thënë Fidelma Donlon, administratore e Gjykatës Speciale.
Seanca e radhës paragjyqësore do të mbahet në gjysmën e dytë të shatorit.
Në aktakuzën e konfirmuar, Shala ngarkohet me përgjegjësi penale individuale në forma të ndryshme për krime lufte, si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur jondërkombëtar në Kosovë dhe në lidhje me këtë konflikt.
Shala është transferuar në Hagë më 16 mars të këtij viti.
© KOHA. Të gjitha të drejtat janë të rezervuara.
