Ndonëse plani për vaksinimin masiv parasheh imunizimin e deri në 16 mijë personave në ditë, vetëm 965 doza të vaksinës janë dhënë në 24 orët e fundit në nivel vendi.
Vaksinimi masiv ka nisur të martën, më 15 qershor, por numri i vaksinave të dhëna vazhdon të jetë i ulët.
Në sallën “1 Tetori” këtë të diel është parë një numër i vogël qytetarësh. Ata kanë thënë se gjithçka ka shkuar me rregull.
“Vaksinën e parë e kom marrë para disa mujve, për sot e kom pas të caktume me marrë këtë të dytën, edhe të parën kur kemi ardhë... as s’kemi pritë edhe sot s’ka as me pritë as kurgja, shumë mirë po i marrim, unë nuk kom pas kurrfarë komplikimi diçka”, ka thënë Xherim Gashi, qytetar.
“Mirë nja tre a katër ditë m’ka munu e para e tash s’e di... kryet m’ka dhimtë edhe pak si ethe, nja dy ditë se tani nuk kam pasë probleme”, ka thënë Nazife Sahiti, qytetare.
Ndërkaq ministrja e ekonomisë, Artanë Rizvanolli është shprehur se vaksinimi masiv do të ndikojë pozitivisht në ekonominë kosovare.
“Nga ana tjetër edhe ardhja e vaksinave dhe fillimi i vaksinimit në masë të madhe të popullatës do të ndikojë tejet pozitivisht në këtë aspekt”, ka thënë ajo.
Ministria e Shëndetësisë ka njoftuar se numri i të vaksinuarve ka arritur mbi 133 mijë.
E po sipas këtij raporti të MSH-së, nga 2.112 testime, 8 qytetarë kanë rezultuar pozitivë me koronavirus, derisa është shënuar një rast i vdekjes.
Raste aktive mbesin 174.
Gjatë muajve të ardhshëm është paralajmëruar ardhja e 1.2 milionë dozave të vaksinave, si dhe një donacioni nga SHBA-ja.
© KOHA. Të gjitha të drejtat janë të rezervuara.
