Video

Opozita reagon ndaj qasjes së Qeverisë për Marrëveshjen e Washingtonit

Përsëritja e qëndrimit se Marrëveshja e Washingtonit nuk ka vlerë juridike, ka nxitur të shtunën reagimin e opozitës, sipas së cilës, një qasje e tillë rrezikon marrëdhëniet midis SHBA-së dhe Kosovës. Ndërkaq, njohës të çështjeve ndërkombëtare thonë se me SHBA-në është nënshkruar vetëm një letër zotimi

Deklarata e zëdhënësit të Qeverisë së Kosovës, Përparim Kryeziu se Marrëveshja e Washingtonit nuk ka vlerë juridike, ka nxitur reagimin e partive opozitare. Një ditë pas kësaj deklarate, të shtunën, një qëndrim të tillë, LDK-ja, PDK-ja e AAK-ja e kanë cilësuar si të rrezikshëm për marrëdhëniet mes SHBA-së dhe Kosovës.

“Për ta përsëritur një qëndrim të kamotshëm të kryeministrit Kurti më duhet të them se së pari ai dokument nuk e ka vlerën dhe natyrën juridike të një marrëveshjeje, për shkak se asnjë nuk është sjellë në Kuvend as për t’u diskutuar as për ta marrë mbështetjen e Kuvendit dhe si i tillë, me të drejtë është quajtur si dokument me zotime të njëanshme të një Qeverie e cila në kohën e nënshkrimit të këtij dokumenti ishte pa legjitimitet dhe më pastaj në ndërkohë, u pat vërtetuar se nuk gëzon ligjshmërinë e nevojshme për të qenë në Qeveri”, kishte thënë Kryeziu të premten.

Të shtunën, kryetari i LDK-së, Lumir Abdixhiku, derisa ka ironizuar me Kryeziun, ka thënë se çdo marrëveshje ndërkombëtare është e obligueshme.

“Aq di i shkreti s’di më shumë. Çdo marrëveshje ndërkombëtare me ShBA-në është e obligueshme dhe është në interes të Kosovës”, ka thënë ai.

Ndërkaq, kreu i AAK-së, Ramush Haradinaj, ka kërkuar nga kryeministri Albin Kurti të distancohet nga deklarata e zëdhënësit të tij. Ai tutje ka thënë se askush nuk mund ta rrezikojë partneritetin e vendit me Shtetet e Bashkuara të Amerikës.

“Nëse Kryeministri nuk e përgënjeshtron këtë deklaratë të zëdhënësit të tij, ai merr gjithë përgjegjësinë e rrezikimit të partneritetit strategjik me Amerikën që është jetik për Kosovën. Këtë nuk do të mund ta bëjë askush, asnjë qeveri e asnjë kryeministër!”, ka shkruar Haradinaj në rrjetet e tij sociale.

Të rrezikshme e kanë cilësuar edhe Partia Demokratike e Kosovës deklaratën e zëdhënësit të Qeverisë. Deputetja e PDK-së, Blerta Deliu - Kodra ka shkruar se Kurti e shpalli armiqësore SHBA-në.

”Kryeministri Kurti shpalli armiqësore Shtëpinë e Bardhë duke kontestuar vlefshmërinë juridike të marrëveshjes dhe legjitimitetin e nënshkrimit të presidentit të Shteteve të Bashkuara të Amerikës. Siç na kujtohet, ish-kryeministri izraelit, pa qenë fare i pranishëm në takim dhe i përfshirë në negociata, por vetëm nëpërmjet një komunikimi me telefon me presidentin amerikan, konfirmoi vullnetin e presidentit të SHBA-së duke respektuar marrëveshjen e arritur në Shtëpinë e Bardhë dhe duke e zbatuar atë me njohjen e shtetit të Kosovës”, ka thënë Deliu-Kodra. Ka shtuar se janë të rrezikshme përpjekjet e tilla. “Përpjekjet për të armiqësuar marrëdhënien e Kosovës me SHBA-të, duke trilluar ‘thika mbi harta’ dhe zhvlerësuar legjitimitetin e Shtëpisë së Bardhë për të ndërmjetësuar marrëveshje mes Kosovës dhe Serbisë janë veprime të rrezikshme që kërkojnë reagimin mbarëshoqëror”, ka thënë Deliu-Kodra.

Në anën tjetër, Demush Shasha nga instituti EPIK e sheh ndryshe këtë çështje. Sipas tij, nuk është nënshkruar asnjë marrëveshje në Washington.

“Në këtë drejtim, Qeveria ka një rrugë të qartë para vetes. Në Washington nuk është nënshkruar asnjë marrëveshje dhe në këtë kuptim Përparimi e ka pasë mirë. Është nënshkruar një letër zotimi në mes kryeministrit të Kosovës dhe presidentit të SHBA-së. Tani institucionet duhet të nisin një dialog diplomatik, i cili do t’i hapë rrugë nënshkrimit të letrës pasuese nga ana e Kosovës që do të sqarojë pozicionin e Kosovës karshi pikave kyçe të Washingtonit”, ka thënë Shasha, teksa ka shtuar se në kohën kur u nënshkrua kjo marrëveshje, nuk kishte konsensus politik në vend.

“Mësimi nga e gjithë kjo storie është se përfaqësues politikë të shtetit të Kosovës asnjëherë nuk duhet të marrin obligime ndërkombëtare jashtë vendit pa siguruar legjitimitetin e nevojshëm politik brenda vendit. Në të kundërtën, vendi përsëri do të ballafaqohet me sfidat sikur demarkacioni apo asociacioni, ku ne ende pas 10 vjetësh po sfidohemi nga vendimet që janë marrë jashtë vendit, pa pasur konsensus te nevojshëm politik brenda vendit. Kjo qasje jo vetëm se ka dëmtuar kohezionin politik në Prishtinë, por ka sfiduar kredibilitetin ndërkombëtar të Kosovës në botë”, ka shkruar Shasha.

Kosova në shtator të vitit 2020 nënshkroi një marrëveshje me SHBA-në, e që njëkohësisht nënshkroi një tjetër edhe me Serbinë. E njëjta përmban disa zotime, ku hyn bashkëpunimi mes Serbisë e Kosovës, e po ashtu edhe marrëdhënia diplomatike me Izraelin.