Me kritika mes deputetëve të partive në pushtet dhe atyre në opozitë, e ku nuk kanë munguar as të qeshurat nga të dyja palët, është shoqëruar seanca e së premtes, e në të cilën raportoi kryeministri Albin Kurti. Derisa opozita kritikonte Kurtin për mospërgatitje për dialogun e takimin e së martës me presidentin e Serbisë, kryeministri tha se në Kuvend nuk ka ardhur të flasë për këtë temë, por për procesin e zhvilluar deri më tani
Katër ditë para se të udhëtojë në Bruksel, në takimin e parë me presidentin e Serbisë, Aleksandar Vuçiq, kryeministri i Kosovës, Albin Kurti, është përballur me deputetët e Kuvendit. Në raportimin e tij, Kurti më së paku ka folur për takimin e 15 qershorit, derisa pjesa më e madhe e fjalimit të tij ishte e fokusuar në paraqitjen e një analize të bërë nga Zyra e tij për marrëveshjet e arritura deri më tani mes Kosovës dhe Serbisë, dhe procesin e dialogut mes dy shteteve.
Kurti tha se gjatë kësaj kohe procesi nuk i ka sjellë dobi Kosovës, derisa insistonte se dëmi i është bërë duke vënë afate kohore për përfundimin e tij në përputhje me zhvillimet që ndodhnin në rajon.
“Pse të ngutemi, kur është shpallur pavarësia, askush nuk e ka menduar njohjen nga Serbia. Pse kjo varësi e Kosovës së pavarur nga njohja e pavarësisë sonë nga Serbia. Nuk është shpallur pavarësia që varësia e dikurshme nga Serbia të zëvendësohet me varësinë e shtetit tonë nga shteti i Serbisë”, ka thënë Kurti në Kuvend.
Kreu i ekzekutivit ka përmendur tentimet e bëra përmes takimeve me partitë opozitare për arritjen e një konsensusi në vend.
“Ajo për të cilën unë do të doja të kishim konsensus është që të mos e trajtojmë shtetin tonë si peng i mosmarrëveshjes me Serbinë, sepse kjo është një urgjencë artificiale, e cila ka bërë dëm të jashtëzakonshëm e po vazhdon të na bëjë ende”.
Pas raportimit rreth gjysmë-orësh të kryeministrit Albin Kurti, përfaqësuesit e subjekteve parlamentare opozitare në Kuvend kritikuan atë.
Enver Hoxhaj i Partisë Demokratike të Kosovës, seancën e së premtes e krahasoi me një shkollë verore, mysafir i së cilës ishte “strategu i gjeopolitikës z.Kurti”.
Deputeti i PDK-së, kritikoi Kurtin për mospërgatitje për procesin e dialogut, e veçanërisht për takimin që do të mbahet të martën në Bruksel. Sipas Hoxhajt, kreu i Qeverisë në takim është duke shkuar pa platformë, pa koncept, pa strategji e pa parime.
“Po shkoni në dialog duke i shkelur zotimet tuaja që nuk do të shkoni pa kërkuar falje Serbia, pa u gjetur i zhdukuri i fundit nuk do të shkoni në dialog, pa i paguar dëmet e luftës, janë krejt platforma juaj në 10 vjetët e fundit”, tha deputeti i subjektit më të madh opozitar në Kuvend.
Se shefi i Qeverisë është duke shkuar në dialog i papërgatitur e tha edhe Lumir Abdixhiku nga Lidhja Demokratike e Kosovës. Duke kritikuar paraqitjen e kryeministrit Kurti në Kuvend, Abdixhiku tha se në këtë seancë ai do të duhej të fliste për parimet e platformën e dialogut e jo për atë që ka ndodhur në të kaluarën.
“Ju po udhëtoni në dialog tërësisht i papërgatitur, para se të flisni me Serbinë, duhet të flisni në këtë kuvend, me qytetarët e juaj. Ju duhet në Parlament të parashtroni në kuvend së paku parimet dhe përkufizimet e juaja në këtë proces të rëndësishëm”, tha Abdixhiku.
Raportimin e Albin Kurtit për procesin e deritanishëm të dialogut, deputeti i Aleancës për Ardhmërinë e Kosovës, Ramush Haradinaj, e konsideroi ikje të Kurtit. Haradinaj edhe në Kuvend ka përmendur kërkesën e tij për emërimin e një emisari të posaçëm nga Shtetet e Bashkuara të Amerikës në bisedimet Kosovë-Serbi.
“Prej kujt tjetër po fshihet kryeministri unë, a mos po fshihet se mos Serbia për një arsye të caktuar ka ndonjë fuqi mbi kryeministrin tonë, i cili nuk i lejon vetëm me marr qëndrim kritik para takimit me presidentin e Serbisë”, ka thënë Haradinaj.
Kritikave të partive opozitare me shaka i është përgjigjur kryeministri Albin Kurti. Ai ka ironizuar duke thënë se folësit paraprakë kanë folur në një seancë tjetër për shkak se në rend të ditës në seancën e së premtes nuk është takimi i së martës në Bruksel.
“Ne jemi në të njëjtin vend, në të njëjtën kohë, por jeni në një seancë tjetër. Nuk jeni në këtë seancë që e parasheh si pikë të katërt të rendit të ditës mbi ecurinë e deritanishëm të dialogut me Serbinë”, ka thënë ai.
Megjithëkëtë, Kurti tha se për takimin e 15 qershorit nuk është e nevojshme platforma, ashtu siç e kërkonin partitë në opozitë.
“Çfarëdo platforme për dialogun e ri do të ishte gabim para takimit për dialogun e ri. Platforma nuk është hap i parë, kur e ke hartuar platformën e ke pranuar dialogun. Dialogut që ende nuk i dihet agjenda, prandaj ju keni bërë këso gabime dhe na keni sjellë në këtë situatë”, ka thënë Kurti.
Me të përfunduar përgjigjet e tij, kryeministri Albin Kurti është larguar nga salla e seancave plenare, ndonëse një seancë e tillë është ftuar me kërkesë të vetë Kurtit. Diskutimet vazhduan pa praninë e tij.
Para se në rend të ditës të vinte pika e raportimit të kryeministrit Albin Kurti, deputetët e Lëvizjes Vetëvendosje tentuan që të fusnin në rend dite edhe miratimin e emrave të anëtarëve të Këshillit Shtetëror të Cilësisë.
Inicimi i mocionit procedural për një gjë të tillë është kritikuar nga partitë në opozitë, me arsyetimin se i gjithë procesi duhet të kthehet në pikën zero për shkak të emërimeve në baza familjare dhe se është duke u tentuar të “kontrabandohen” tema, të cilat nuk janë urgjente dhe mund të presin që të procedohen në bazë të rregullave.
Nisma e deputetëve të Lëvizjes Vetëvendosje nuk arriti të realizohej, në mungesë të votave të mjaftueshme.
-
Nga: Valbona Bytyqi
-
11 qershor 2021 23:26
-
Shpërndaje në: