“Shpresë” në spitale – në Gjakovë e Ferizaj asnjë pacient me COVID-19
1
Spitali i Gjakovës e ai i Ferizajt, janë dy spitalet e para që pas një viti nuk kanë asnjë pacient me COVID-19. Sipas mjekëve të Spitalit të Gjakovës, një gjë e tillë paraqet lehtësim për ta, por që assesi nuk duhet të neglizhohen rekomandimet e institucioneve. Ndërkohë, fluks i madh i qytetarëve për t’u imunizuar ndaj COVID-it është vërejtur në këtë komunë.
Pas një viti që nga shfaqja e rasteve të para në Kosovë, objekti i Infektivës në Spitalin e Gjakovës nuk e ka asnjë pacient të dyshuar, apo të konfirmuar me koronavirus.
Këtë të enjte, në këtë Spital nuk është pranuar dhe nuk ka pasur asnjë të hospitalizuar.
Mjekët e këtij reparti e quajnë lehtësim këtë gjë, pas aq shumë kohësh. Megjithëkëtë, potencojnë se qytetarët duhet të vazhdojnë të kujdesen për veten.
Mungesën e oksigjenit e të stafit shëndetësor, ushtruesi i detyrës së drejtorit të këtij spitali i përmend si ndër problemet kryesore, me të cilat janë përballur për shkak të gjendjes me COVID-19.
Përveç Spitalit të Gjakovës, sipas raportit të SHSKUK-së, edhe ai i Ferizajt nuk ka asnjë pacient me COVID-19.
Në anën tjetër, interesim i madh i qytetarëve për t’u vaksinuar ndaj Covidit është vërejtur në Gjakovë. Sipas përgjegjësve të Qendrës së vaksinimit në këtë komunë, procesi deri tani ka shkuar mirë.
