Ndonëse 5 muaj larg nga zgjedhjet komunale, pakënaqësitë brenda PDK-së për të parin e Drenasit kanë nisur të shfaqen.
Të shtunën, përmes një postimi në facebook, Driton Ajazi, njoftoi se Dega e PDK-së në Drenas i ka dhënë mbështetje kandidaturës së tij për kryetar të kësaj Komune.
Por, pak kohë pas njoftimit të Ajazit, Kryesia Qendrore e PDK-së nënvizoi atë që kishte thënë në janar të këtij viti se do të rikandidojë të gjithë kryetarët e komunave në të cilat qeverisë ajo, duke përfshirë këtu edhe Ramiz Lladrovcin.
“PDK-ja e ka rikandiduar Agim Aliun në Ferizaj, Naim Ismajlin në Shtime dhe njëjtë pritet të bëjë edhe me Ramiz Lladrovcin në Drenas dhe Besim Ilazin në Kaçanik. Javën e kaluar, kryetari i PDK-së, Enver Hoxhaj u ka sqaruar edhe në takime private kryetarit të Degës së Drenasit, Sejdi Hoxhës dhe deputetit Ferat Shala, se kandidatura e Ramiz Lladrovcit për Komunën e Drenasit është çështje e mbyllur”, thuhet në njoftimin e PDK-së.
Por, në një prononcim për Kohën, Ajazi ka thënë se pret nga Kryesia Qendrore ta shqyrtojë vendimin, duke shtuar se Drenasit i duhen ndryshime në qeverisje. I pyetur nëse do të tërhiqet nga gara, Ajazi ka thënë se më shumë shpreson në reflektim të kryesisë.
“Deri në mbajtjen e zgjedhjeve në fund të vitit janë edhe pesë muaj dhe kryesia qendrore besoj fuqishëm do ta analizojë në detaje këtë kërkesë dhe këtë vullnet të shprehur në strukturat e degës dhe nuk do të marrë veprime të ngutshme”, ka thënë Ajazi.
Lidhur me arsyet se pse nuk e ka marrë mbështetjen e degës, Koha ka provuar ta kontaktojë edhe kryetarin aktual Ramiz Lladrovci por ai nuk ka pranuar të deklarohet.
E nga qendra e Partisë, nënkryetari Xhavit Haliti, ka thënë se në kryesi është vendosur që Lladrovci të jetë kandidat, porse për kundërshtitë e mundshme do ta analizojnë situatën.
“Me vendim të përbashkët të kryesisë në Drenas, kandidat është Ramiz Lladrovci kaq di unë. Tani me siguri që pason një analizë në kryesi të partisë dhe me bisedu edhe njëherë me degën atje. Sepse, këso ngjarjes kanë ndodhur edhe më herët kur nuk janë pajtuar me një kandidaturë disa dhe të tjerët kanë shpallur një kandidaturë tjetër. Por, sidoqoftë unë po besoj që gjithçka do të stabilizohet në sajë të një marrëveshjeje të mundshme dhe duke zbatuar statutin e partisë”, ka thënë Xhavit Haliti, nënkryetar i PDK-së.
Edhe U.D. i kryetarit të PDK-së, Enver Hoxhaj, ka ftuar anëtarët e PDK-së dhe qytetarët e Drenasit që të mbështesin qeverisjen e mirë të PDK-së në këtë komunë dhe kryetarin Ramiz Lladrovci.
Me degën në Drenas, Partia Demokratike e Kosovës ka pasur probleme edhe më herët.
Në zgjedhjet e kaluara, Lladrovci, kundërshtar brenda partisë për postin e kryetarit të Drenasit pati Naim Bazajn, i cili për shkak të mosnominimit, zyrtarizoi kandidaturën si i pavarur dhe më pas u tërhoq nga gara.
© KOHA. Të gjitha të drejtat janë të rezervuara.
