Mbjellja e një milion drurëve brenda një viti, është synimi që Zyra e Presidentes Vjosa Osmani e dy ministri ia kanë vënë vetes në Ditën Botërore të Mjedisit.
Përmes një video-kampanje, Osmani së bashku me ministrin e Mjedisit dhe Planifikimit Hapësinor, Liburn Aliu e atë të Bujqësisë e Pylltarisë, Faton Peci, kanë kërkuar përkrahje për këtë iniciativë.
“Sot në Ditën Botërore të Mjedisit ne duam t’ju themi se ka ardhur koha të lëvizim nga fjalët në vepra. Gjersa po punojmë vazhdimisht për të siguruar një ringritje të qëndrueshme pas pandemisë, e kemi të qartë se çfarëdo që do të ndërmarrim nuk mundemi kurrsesi ta bëjmë atë duke anashkaluar mbrojtjen e mjedisit”, ka thënë Osmani në deklarimin e saj në video.
Më tutje, ministri i Mjedisit dhe Planifikimit Hapësinor, Liburn Aliu, ka kërkuar ndihmë në arritjen e synimit të tyre.
“Sfidat i kemi të shumta e të përbashkëta, por besoj fuqishëm që nga sot po hapim një kapitull të ri të mentalitetit qeverisës në vendin tonë. Sot po ju drejtohem në emër të tre institucioneve të cilat vendosën që të hedhin hapin e parë në këtë drejtim”, ka thënë ai.
Kurse, ai i Bujqësisë ka përmendur shpyllëzimin e ndotjen e ajrit si ndër problematikat kryesore të Kosovës ndër vite.
“Në mënyrë që vitin tjetër Dita e Mjedisit të na gjejë në një Kosovë më të gjelbër ne ju ftojmë që t`i bashkoheni thirrjes sonë për mbledhjen e 1 milionë drurëve në Republikën e Kosovës”, ka thënë Peci.
E për shënimin e Ditës së Mjedisit janë organizuar edhe aktivitete të tjera.
Nëpërmjet vizatimeve të ndryshme e pankartave, nxënësit kanë bërë thirrje për rritjen e hapësirave të gjelbëruara e mbrojtjen e tyre.
Aktiviteteve të nxënësve në Prishtinë u është bashkuar edhe ministrja e Arsimit, Arbërie Nagavci e Liburn Aliu, ministër i Mjedisit.
Nagavci u ka bërë thirrje mësimdhënësve që në shkolla të praktikojnë aktivitete praktike me qëllim të zhvillimit të njohurive te fëmijët për ambientin.
“Besoj që thirrjet në përgjithësi shumë më tepër duhet t’u bëhen të rriturve, sepse fëmijët jo vetëm që janë shumë kreativë, por janë edhe të kujdesshëm ndaj ruajtjes së mjedisit”, ka thënë Nagavci në fjalën e saj.
Kurse, ministri Aliu ka premtuar se do të merren hapa konkretë në mbrojtjen e mjedisit. “Ne sot kemi lumenj të paktë, kanë pak ujë dhe në ata lumenj uji i tyre nuk përdoret drejt. Ne kemi pyje të pasura, por ato pyje tona priten jashtëzakonisht shumë, kemi parqe të cilat po dëmtohen çdo ditë, kemi ndërtime të vazhdueshme ku toka jonë bujqësore po pakësohet çdo ditë, andaj e kemi të domosdoshme që të ndërmarrim hapa të shpejtë në raport me mjedisin”, ka thënë Aliu, në një nga aktivitetet e organizuara në kryeqytet.
Në anën tjetër, në Mitrovicë dhjetëra përfaqësues të institucioneve lokale e qendrore, ndërkombëtare, shoqërisë civile, si dhe qytetarë, kanë marrë pjesë në turneun me biçikleta ku kërkuan më shumë investim në shtigje për këmbësorë dhe çiklistë.
© KOHA. Të gjitha të drejtat janë të rezervuara.
