Bashkimi Evropian i ka reaguar kryeministrit Albin Kurti, një ditë pasi ai tha se takimi me Serbinë në muajin qershor nuk shënon vazhdimin e dialogut.
Në një përgjigje me shkrim, zëdhënësi i BE-së, Peter Stano, ka thënë se pavarësisht ndryshimit të udhëheqjes së Qeverisë presin që përkushtimi për dialogun dhe zbatimin e marrëveshjeve të mbetet i njëjtë.
“Rruga drejt BE-së për Kosovën dhe Serbinë shkon përmes dialogut të lehtësuar nga BE-ja. Ky dialog ka nisur në vitin 2011 dhe vazhdon me takimin e nivelit të lartë së shpejti. Në kuadër të procesit që është në vazhdim e sipër, janë ndërruar qeveritë në të dyja anët, por përkushtimi ka mbetur. Të gjitha çështjet e diskutuara deri me tash dhe që do të diskutohen në të ardhmen në kuadër të dialogut janë kyç për normalizimin e marrëdhënieve mes Kosovës dhe Serbisë. Bashkimi Evropian dhe shtetet anëtare presin nga të dyja palët që të vazhdojnë përkushtimin e tyre për angazhim në këtë dialog dhe të zbatojnë të gjitha marrëveshjet e mëparshme. Kjo nënkupton se për çdo gjë që është arritur dakordim, duhet të ketë implemetim. BE-ja dhe shtetet anëtare të saj presin nga autoritetet e reja në Prishtinë që të angazhohen në mënyrë konstruktive, me qëllim të vazhdimit të takimeve në kuadër të dialogut të lehtësuar nga BE-ja dhe të shfrytëzojnë mundësinë që këtë proces të rëndësishëm ta përmbyllin në mënyrë të suksesshme. Lidhur me datën, kohën dhe agjendën e takimit të ardhshëm të nivelit të lartë në Bruksel, ne do ta bëjmë të ditur kur është e përshtatshme”, tha Stano.
Të mërkurën, Kurti tha se me Vuçiqin në qershor takohen për herë të parë në kuadër të dialogut dhe se aty do të shohin se “çfarë mund të jetë kapitulli i ardhshëm” i këtij procesi.
“Është takim për dialogun e ardhshëm por nuk është vazhdim i dialogut të mëhershëm”, kishte deklruar kryeministri Kurti.
Për deklarimet e Kurtit ditëve të fundit janë ankuar në Serbi.
Ministri i Punëve të Jashtme të Serbisë, Nikola Selakoviq, pas takimit me zëvendësndihmëssekretarin e shtetit amerikan, tha se gjuha e përdorur nga Kurti nuk kontribuon në bisedimet mes dy shteteve.
“Është e papranueshme që Prishtina të shmangë përmbushjen e detyrimeve të saj, veçanërisht formimin e bashkimit të komunave serbe, duke këmbëngulur vetëm në njohjen reciproke”, ka thënë të enjten Selakoviq.
Për deklaratat e Kurtit kanë reaguar edhe Lista Serbe. Nënkryetari i saj, Igor Simiq, në një përgjigje për agjencinë e lajmeve Tanjug ka thënë se kreu i Qeverisë së Kosovës është duke i ikur dialogut.
Sipas Simiqit, në Kosovë nuk ka gatishmëri për gjetjen e një zgjidhjeje, e cila do të ishte në interes të shqiptarëve dhe serbëve.
© KOHA. Të gjitha të drejtat janë të rezervuara.
