Kërkesa të ndryshme kanë pasur partitë politike për datën e mbajtjes së zgjedhjeve lokale.
Këtë të mërkurë, përfaqësuesit e partive politike janë takuar me presidenten Vjosa Osmani për të diskutuar lidhur organizimin e zgjedhjeve komunale, të cilat pritet të mbahen në vjeshtë.
Kryetari i Vetëvendosjes, Albin Kurti, ka thënë se tetori pritet të jetë muaji i zgjedhjeve të reja.
“Për neve si VV, sa më herët zgjedhjet, aq më mirë është, por presidentja do t’i takojë edhe kryetarët e partive të tjera dhe në fund do ta caktojë një datë shumë të rëndësishme edhe për demokracinë në republikën tonë, por edhe për qeverisjen e mirë komunale", ka thënë Albin Kurti, kryetar i LVV-së.
Për dallim nga Vetëvendosje, PDK-ja e LDK-ja kanë përmendur të dielën e fundit të tetorit si mundësi për mbajtjen e zgjedhjeve lokale.
Po, para caktimit të kësaj date, ushtruesi i detyrës së kryetarit të PDK-së, Enver Hoxhaj, ka pasur një kërkesë tjetër ndaj presidentes.
"PDK-ja kërkon nga presidentja që para se të merret data të kompletohet KQZ-ja dhe ne kërkojmë që PDK-së ti takojë anëtari i dytë dhe mendojnë që të gjitha anët juridike janë në anën tonë", është shprehur Hoxhaj.
“Për shkak të organizimit më të mirë të zgjedhjeve, për shkak se Kosova është në pandemi dhe duhet ta kalojë, por edhe për vaksinimin dhe rimëkëmbjen ekonomike, 31 tetori është datë e përshtatshme, por çdo datë është e pranueshme për LDK-në”, ka shtuar kreu i LDK-së, Lumir Abdixhiku.
E datë të caktuar nuk kishte Aleanca për ardhmërinë e Kosovës.
“Për AAK-në është tepër me rëndësi përgatitja e zgjedhjeve dhe data të jetë e dakorduar politikisht edhe me KQZ-në, edhe me Presidencën”, pohoi Besnik Tahiri, sekretar i përgjithshëm i AAK-së.
Pas përfundimit të takimeve e konsultimeve me të gjitha partitë politike, presidentja pritet ta caktojë datën për zgjedhjet lokale.
Zgjedhjet e fundit lokale janë mbajtur në tetor të vitit 2017.
© KOHA. Të gjitha të drejtat janë të rezervuara.
