Qeveria e Kosovës ka kërkuar nga Shqipëria që ta heqë taksën prej 5 eurosh të vendosur në Rrugën e Kombit.
Kërkesën për heqjen e taksës, e cila ishte shoqëruar me reagime të shumta, zëvendëskryeministri i Kosovës, Besnik Bislimi, e ka arsyetuar me vonesat që shkaktohen si pasojë e saj.
Këtë kërkesë e ka paraqitur vetë Bislimi në takimin që ai dhe ministri i Infrastrukturës, Liburn Aliu, e patën me ministrin e Turizmit të Shqipërisë, Blendi Klosi.
Mirëpo, kësaj kërkese ka refuzuar t’i përgjigjet vetë Klosi, i cili në konferencën për media foli vetëm për rëndësinë e turizmit mes dy vendeve.
E ministri i Mjedisit, Planifikimit Hapësinor dhe Infrastrukturës, Liburn Aliu, tha se së bashku me autoritetet në Shqipëri do të ndërmarrin një aksion pastrimi gjatë muajit qershor.
Taksa për qytetarët e Kosovës në rrugën e kombit ishte vendosur në mars të vitit 2018. Është 5 euro për një drejtim.
© KOHA. Të gjitha të drejtat janë të rezervuara.
