Video

Mbi 64 mijë të vaksinuar, javën e ardhshme do të fillojë dhënia e dozave të dyta

Nga data 31 maj, do të fillojë dhënia e dozave të dyta, pasi tashmë atë e kanë marrë mjekët që dozën e parë e morën në Kukës, ka thënë Niman Bardhi, menaxher i qendrës së vaksinimit “1 Tetori” në një përgjigje për KOHA.

“Me doza të para deri në mesditën e të dielës janë vaksinuar vetëm 100 persona në Prishtinë”, ka deklaruar Bardhi.

“Edhe përkundër terminëve dhe konfirmimeve që i kemi marrë nga qytetarët që do jenë për tu vaksinuar, ne e dimë numrin se sa janë të telefonuar dhe sa janë të konfirmuar, por aktualisht nuk ka korresponduar konfirmimi nga ana e tyre në raport me ardhjen e tyre”, ka thënë menaxheri i qendrës së vaksinimit “1 Tetori”, ka thënë Bardhi.

Bardhi ka njoftuar se në këtë qendër janë bërë disa ndryshime për ta shtuar kapacitetin e të vaksinuarve brenda ditës.

“Përgatitjet veҫ tashmë janë të përfunduar, në fakt, kemi edhe rreth 15 tavolina dhe që presim që brenda dy turneve paradite dhe pasdite t’i kemi deri në 30 ekipe mjekësore”, ka thënë ai.

Gjatë kësaj kohe, ka vazhduar imunizimi edhe në komunat e tjera, ku janë vaksinuar rreth 700 persona.

Përveç personave që lajmërohen në qendrat e vaksinimit, thirrja po vazhdon edhe për ata që janë regjistruar në platformën elektronike e-Kosova.

MSH-ja u ka bërë thirrje qytetarëve të ҫdo grupmoshe të regjistrohen në e-Kosova.

Në 24 orët e fundit në Kosovë nuk është raportuar ndonjë rast i vdekjes si pasojë e COVID-19, ndërsa janë regjistruar 23 raste të reja pozitive me koronavirus. Rastet pozitive janë nga testimi i 2120 mostrave.

Për drejtorin e Klinikës Infektive, Izet Sadiku, ulja e numrit të rasteve të të infektuarve dhe vaksinimi i popullit nënkupton se gjendja me pandeminë veçse ka filluar të futet nën kontroll.

“Sigurisht nëse nuk ka ndonjë të re sa i përket këtij virusi, vaksinimi i madh i popullsisë deri në shtator do të krijonte efektet e para të futjes nën kontroll të pandemisë dhe kthimi i një normaliteti qysh ka qenë para dhjetorit të vitit 2019”, ka thënë drejtori i Klinikës Infektive, Izet Sadiku.

Ulja e numrit të rasteve pozitive dhe numrit të vdekjeve ka qenë arsyeja që MSh-ja do t’i lirojë masat nga e hëna ku përfshihen: heqja e orës policore, zgjatja e orarit të punës për gastronominë deri në orën 23 dhe heqja e pjesshme nga detyrimi për bartjen e maskës.