Një tjetër kandidaturë është zyrtarizuar në garën për kreun e kryeqytetit, në zgjedhjet lokale këtë vjeshtë.
Është kryetari i Lidhjes Demokratike të Kosovës, Lumir Abdixhiku, i cili ka njoftuar se kandidat për Prishtinën nga partia e tij do të jetë Përparim Rama, arkitekti shqiptar me famë ndërkombëtare.
“I njohur për angazhimin e tij kryesor në planifikim hapësinor të Lojërave Olimpike në Londër në vitin 2012; për angazhimin e tij në ndërtimin e vizionit të Doha’s, kryeqytetit të Katarit; për projekte madhore në New York, Dublin, Bazel, Pragë e deri në Damask të Sirisë - Rama i Prishtinës mban një bagazh mbresëlënës të shenjave që i mbijetojnë kohës. Tani ka ardhur koha që ecjen e tij nëpër botë ta ndërpresim; e këtë bagazh të madh të tij ta kthejmë në qytetin e tij e tonin - në Prishtinë”, ka thënë Abdixhiku.
Vitin e kaluar, Abdixhiku si ministër i Mjedisit kishte urdhëruar anulimin e projektit të tash kandidatit të tij për kryetar të Prishtinës lidhur me ndërtimin e lagjes luksoze pranë liqenit të Badovcit.
Pas alarmimit të ambientalistëve e shoqërisë civile, projektin në të cilin Rama kishte qenë projektues dhe bashkinvestitor, Abdixhiku e kishte vlerësuar të dëmshëm për natyrën.
Kushtet e ndërtimit të kësaj lagjeje më pas u anuluan nga kryetari aktual i Prishtinës, Shpend Ahmeti, i cili nuk ka vendosur nëse do të rikandidojë për këtë pozitë.
Deri më tani, publikisht kandidaturën për kryeqytetin e ka shpallur vetëm Daut Haradinaj nga AAK-ja.
Kurse ka kohë që si kandidat i mundshëm nga Lëvizja Vetëvendosje përmendet emri i Arben Vitisë, e nga Partia Demokratike e Kosovës ai i Uran Ismailit.
Dy kandidatura për kryetarë komunash të shtunën i ka zyrtarizuar edhe PDK-ja.
Gara për Prizrenin i është besuar sërish Shaqir Totajt, i cili humbi zgjedhjet e kaluara.
“Shaqa është pakrahasimisht alternativa më e mirë. Ai është një personalitet që tejkalon kufijtë partiak dhe një mundësi e mirë për bashkim qytetar për ti dhënë Prizrenit kryetarin që ka nevojë dhe atë që e meriton. Shaqa është një figurë që është rritur bashkë me Prizrenin dhe më mirë se secili ia di dhimbjen, traditën, historinë por edhe kërkesat”, ka deklaruar Enver Hoxhaj, ushtrues detyre i kreut të PDK-së.
Kurse për Fushë-Kosovën PDK-ja ka zgjedhur të kandidojë me Rrahim Tërnavën.
Data e zgjedhjeve komunale akoma nuk është caktuar, por ato pritet të mbahen në vjeshtë.
© KOHA. Të gjitha të drejtat janë të rezervuara.
