330 ushtarë të Forcës së Sigurisë së Kosovë kanë vazhduar stërvitjen e tyre ushtarake “’Defender Europe 21’’ të organizuar nga NATO-ja.
Të premten, trupat e FSK-së u vizituan nga presidentja Vjosa Osmani e kryeministri Albin Kurti.
E gjatë vizitës së bërë në kampin e FSK-së në Devë të Gjakovës, Osmani përmendi sakrificën e popullit kosovar dhe luftën e UÇK-së, derisa shtoi se ky mision thellon partneritetin strategjik me Perëndimin.
“Të dashur oficer të forcave tona të armatosura, të dashur ushtarak, 22 vjet më parë gra e burra dinjitar të Kosovës, të udhëhequr nga ideali për lirinë u rreshtuan nën emblemën e Ushtrisë Çlirimtare të Kosovës, dhe e dëshmuan këmbënguljen tonë për ta fituar lirinë. Ata u përballëm me egërsinë e një regjimi edhe kur nuk kishin burime të mjaftueshme siç kemi tani, por ata e patën guximin dhe vendosmërinë për të qëndruar fort në kauzën e lirisë. Sot, 22 vjet pas ne bijat e bijtë e tyre të veshur me idealin e sigurimit të paqes e stabilitetit për vetën e për të tjerët i kemi lidhur qëllimet tina me përkushtimin e partneritetit tonë strategjik me ShBA-të, për të siguruar lirinë dhe për ta garantuar atë”, ka thënë Osmani.
Ndërsa në ditën kryesore të kësaj stërvitjeje, kryeministri i vendit, Albin Kurti, ushtarëve të FSK-së iu premtoi përkrahje e rritje të buxhetit për Ushtrinë.
“Jam i bindur që pas këtij ushtrimi Forca e Sigurisë së Kosovës ka fituar aftësi të reja ushtarake dhe edhe njëherë ju përgëzoj për arritjet dhe ju siguroj që kabineti im qeveritar do të vazhdojë mbështetjen e do ta shtojë buxhetin për Forcën e Sigurisë së Kosovës në rrugën e saj për arritjen e kapaciteteve të plota operacionale. Populli ynë e do dhe e mirëpret paqen, shteti yen është faktor dhe kontribuues i paqes’’, është shprehur Kurti.
Ndërkaq gjenerali i FSK-së, Rrahman Rama, tha se FSK-ja ka për qëllim të jetë pjesë e strukturave euroatlantike.
Stërvitjet ushtarake “Defender Europe 21” në Kosovë kanë filluar më 17 maj.
© KOHA. Të gjitha të drejtat janë të rezervuara.
