Të dielën kudo në Kosovë ishte ditë pushimi në arsim. Por, në fshatin Shipashnicë, Komuna e Kamenicës, ndodhi një incident në lidhje me arsimin. Aq i madh ishte, sa u desh të intervenojë edhe Policia.
Prindërit po vazhdojnë të kundërshtojnë reformat në arsim të nisura kohë më parë nga kryetari i Kamenicës.
Banorët e fshatit Shipashnicë e Poshtme të dielën kanë bllokuar derën e hyrjes së një shkolle me qëllim për të mos i lënë zyrtarët komunalë që të vendosin brenda kësaj shkolle inventarin për fëmijët parashkollorë.
Kjo ishte pjesë e reformave në arsim të premtuara nga kryetari Qëndron Kastrati.
Kundërshtimi i prindërve çoi në tensionim të situatës. Zyrtarët komunalë ia dolën të largohen, ndërkohë Policia u detyrua të përdorë sprej për ta futur në kontroll situatën.
Rastin e ka konfirmuar zëdhënësi i Policisë për rajonin e Gjilanit, Ismet Hashani, i cili shtoi se spreji është përdorur, pasi rreth 50 banorë të fshatit sulmuan zyrtarët komunalë.
“Aty janë mbledhur rreth 50 banorë të fshatit në shenjë pakënaqësie ku me këtë rast, janë sulmuar zyrtarët komunalë. Për ta futur situatën nën kontroll është përdorur edhe spreji nga ana e zyrtarëve policorë. Për ngjarjet në vazhdim, ju njoftojmë me kohë”, ka thënë Hashani.
Për ngjarjet në Shipashnicë kryetari i Kamenicës, Qëndron Kastrati, ka fajësuar ministren e Arsimit, Arbërie Nagavci. Sipas tij, ajo e ka nxitur gjithë situatën.
“Është vërtet për keqardhje deri në ç'masë është duke u manipuluar komuniteti nga disa të badihavxhinj. Nuk do ta besoja kurrë që në shekullin XXI një prind më përpara e dëgjon një manipulues sesa zemrën e tij për fëmijën e vet. Për më shumë, ministrja Nagavci me qasjen e saj po hedh benzinë në zjarr. Kjo është e turpshme dhe e pafalshme”, ka thënë Kastrati.
Ai ka shtuar se skenat e sotme tregojnë se ka shumë punë për t’u bërë.
Ndërkohë, ministrja e Arsimit, Arbërie Nagavci, ka mohuar se Ministria që ajo drejton ka ndërhyrë në situatën e krijuar mes komunës dhe banorëve.
“Më duhet ta bëj të qartë edhe një herë se si ministre e Arsimit e kam obligim Kushtetues që ta realizoj të drejtën e çdo fëmije për shkollim dhe do të punojmë që asnjë fëmije të mos i mohohet kjo e drejtë. Ky duhet të jetë dhe qëllimi i të gjithëve, nuk ka asnjë arsyetim për faktin se më shumë se 440 fëmijë janë privuar nga kjo e drejtë. Ftoj komunën që të jetë në nivel të përgjegjësisë e të mos lejojë asnjëherë më të përsëriten situata të tilla”, është shprehur Nagavci.
Reforma e Komunës së Kamenicës në arsim parasheh ndër të tjera, bashkimin e klasave dhe shkollave, meqë në disa fshatra ka fare pak nxënës nëpër klasë dhe në shkolla. Kjo është kundërshtuar tash e sa kohë nga prindërit, pasi sipas tyre, fëmijët do të detyrohen të udhëtojnë nëpër fshatra të tjera për të ndjekur mësimin.
“Me qëllim të ngritjes së cilësisë në shkolla dhe për arritje të suksesit sa më të mirë te nxënësit, Drejtoria Komunale për Arsim në Komunën e Kamenicës do të bashkojë nxënësit nga klasat me numër të vogël të nxënësve në një klasë ku mesatarisht do të jenë 20 nxënës. Kështu, nxënësit do të socializohen më shumë me moshatarët e tyre, do të mësojnë së bashku, do të sfidojnë njëri-tjetrin, do të garojnë, do të mësojnë të respektojnë mendimin e tjetrit dhe do nxitet edhe më shumë të menduarit kritik dhe kreativiteti te nxënësit”, thuhet në Raportin mbi riorganizimin e shkollave në Komunën e Kamenicës.
Po ashtu shkollat që do të mbeten të lira, parashihet të kthehen në institucione parashkollore.
“Nga ky riorganizim i shkollave do të mbesin të lira disa objekte në fshatra të ndryshme të Kamenicës. Ideja primare për shfrytëzimin e këtyre objekteve është hapja e Qendrave Mësimore aty ku është e nevojshme, hapja e çerdheve sipas nevojave të komunitetit, shndërrimi në biblioteka, shkolla profesionale apo arsimim për të rritur. Qëllimi është që asnjë nga këto objekte të mos mbetet pa u shfrytëzuar. Planifikimi dhe rivitalizimi i këtyre objekteve do të bëhet në pajtim me kërkesat e komunitetit për shfrytëzim sa më të mirë të këtyre objekteve dhe realizimit të qëllimeve të banorëve në atë lokacion”, thuhet në raport.
Për incidentin e së dielës ka reaguar edhe ushtruesi i detyrës së kryetarit të PDK-së, Enver Hoxhaj. Ai e fajësoi Qeverinë Kurti, për siç pretendon ai, se po përdor nxënësit, prindërit dhe mësuesit e Kamenicës si fushëbetejë për inate e ego të sëmura pushteti.
© KOHA. Të gjitha të drejtat janë të rezervuara.
