Pas më shumë se 5 vjetëve, ministrja e Drejtësisë, Albulena Haxhiu, deputeti i AAK-së, Pal Lekaj, e ish-deputetët Donika Kadaj Bujupi e Besa Baftiu, janë liruar nga akuzat për posedim të paautorizuar të armëve.
Gjykata Themelore e Prishtinës, këtë të martë pas fjalës përfundimtare ka shpallur aktgjykimin për pafajësinë e këtyre, duke thënë se Prokuroria nuk ka pasur prova të mjaftueshme për të vërtetuar se të njëjtit kanë kryer vepër penale.
“Nuk ka asnjë ekspertizë që e vërteton faktin se sendet e sekuestruara po të ishin armë ashtu siç pretendon Prokuroria, nuk do të ishin kthyer tek i pandehuri”, ka deklaruar Fatime Dërmaku, gjyqtare.
Avokati i Pal Lekajt, Arianit Koci, tha se ky është “një proces që është dashur të përfundon vite më parë më në fund përfundoj tash”.
Megjithatë, gjatë mbajtjes së seancës përfundimtare, mes prokurorit e të akuzuarve u bë debat, si shkak i përmendjes së regjimit të Milosheviqit nga ana e prokurorit Ilaz Beqiri.
“Pasojat e gazit i kam përjetuar edhe unë vetë në vitin 1981 dhe kërkojë që të pandehurit të shpallen fajtor sipas ligjit”, ka thënë Iliaz Beqiri, prokuror.
Në këtë deklaratë, reaguan të akuzuarit.
“Sipas krahasimeve të tij që veprimet kriminale të Milosheviqit dhe me ato tonat, janë fyerje dhe është e papranueshme”, tha Donika Kadaj – Bujupi, ish-deputete.
E fyer, i ndje edhe ish-deputetja Besa Baftiu.
“U ndjeva e fyer nga fjala e prokurorit për regjimin serb të Millosheviqit. Ketë se prita nga prokurori dhe pse dimë se puna e tij është të ofrojë prova”, tha ajo.
Deputeti Pal Lekaj e quajti të pakuptimtë krahasimin e bërë nga prokurori Beqiri.
“Unë nuk kam si mos të e shpreh shqetësimin tim, për prokurorin në krahasime të tilla me ish deputetët. Prokuroria është dashur të veprojë ndaj atyre që kanë rrezikuar vendin e jo me neve...Ne akuzohemi për diçka që s’ka lidhje me veprën penale dhe kjo është mungesë profesionalizmi”, shtoi ministrja Albulena Haxhiu.
Të akuzuarit gjatë gjithë kohës kanë fajësuar prokurorin e shtetit, se qëllimisht e ka zgjatur procesin tërë këto vite për të dëmtuar dhe pamundësuar kandidimin e tyre për deputet në zgjedhjet e mbajtura këtë vit.
Aktakuza kundër katër të akuzuarve u ngrit më 2016, me akuzat se kishin futur bombola të gazit lotsjellës në Kuvendin e Kosovës, duke e kryer veprën penale armëmbajtje pa leje. Aktakuza kishte të bënte me kohën kur partitë atëherë në opozitë kundërshtonin marrëveshjen për demarkacionin.
© KOHA. Të gjitha të drejtat janë të rezervuara.
