Të natyrës dëshirore, pa plan e pa strategji e ka quajtur Lidhja Demokratike e Kosovës programin e Qeverisë Kurti për politikë të jashtme.
Në një konferencë për media të dielën, nënkryetarja e LDK-së, Shqipe Mjekiqi, ka thënë se Qeveria nuk ka parime të qarta lidhur me dialogun me Serbinë, e as plan për njohje të reja.
“Qeveria nuk ka plan për njohjet e reja, ku mungesa e një plani për njohjet e reja, do të pengojë konsolidimin e Kosovës në sistemin ndërkombëtar. Qeveria nuk e shpjegon se si do të arrihen fondet e IPA-së mbi bazën e kriterit të konkurrencës. As që mund të bëhet fjalë për nisjen e procedurave për anëtarësim në Bashkimin Evropian. E para, vendi duhet ta marrë statusin e kandidatit, e dyta Këshilli Evropian duhet ta marrë dritën e gjelbër, pra negociatat nuk mund të fillojnë pa u pajtuar të gjitha shtetet anëtare”, ka thënë ajo.
Pati kritika edhe për procesin e liberalizimit të vizave.
“Ne konsiderojmë që procesi i liberalizimit të vizave është proces i vonuar. Do të ishte mirë që Qeveria të na tregojë se çfarë plani ka për tendencën që ta kthejë procesin nga një proces të politizuar në atë teknik”, ka shtuar tutje ajo.
Ndërsa, të pyetur për konfliktin në mes të Izraelit dhe Palestinës, nënkryetari i LDK-së, Muhamet Hamiti, ka thënë se LDK është në një linjë me politikën e SHBA-së dhe të botës perëndimore.
© KOHA. Të gjitha të drejtat janë të rezervuara.
