Numri i punonjësve shëndetësorë që kanë mbërritur paraditen e së mërkurës, në sallën “1 tetori”, ishte i madh. Ata si edhe një muaj më herë kur ka nis procesi i vaksinimit anticovid, edhe këtë herë ishin grupi me prioritet për ta marr të parët dozën e prodhuesit “Pfizer/BioNTech”, nga kontingjenti prej 4 mijë e 680 vaksinave që kanë mbërritur një ditë më parë, donacion nga Bashkimi Evropian. Kjo sasi është vetëm një pjesë e 95 mijë dozave që janë siguruar nga BE-ja, shpërndarja e së cilave do të zgjas deri në muajin gusht.
shëndetësor që i është nënshtruar vaksinimit të mërkurën, për arsye të ndryshme nuk janë vaksinuar me vaksinën e “AstraZeneca”. Por, të dëshpëruar nga salla “1 tetori” ktheheshin qytetarët e moshuar. Ata si edhe herë tjera janë interesuar se për mundësinë e vaksinimit.
Ministri i Shëndetësisë, Arben Vitia, ka bërë të ditur për KOHËN, se shumë shpejt vendi do të pranojë edhe kontingjente të tjera me vaksina, të cilat do të mund të përdoren për vaksinimin edhe të qytetarëve.
“Nga Bashkimi Evropian presim që çdo javë ose 10 ditë të kemi furnizime të tilla. Kurse nga mekanizmi COVAX ne presim që brenda një kohe të shkurtër të vijë një pjesë e madhe e vaksinave, që do të jetë brenda 10 dite. Unë besoj që me arritjen e dozave të reja, brenda një jave, procesi do të jetë shumë më i lehtë për qytetarët”, ka thënë Vitia, duke treguar se me ardhjen e kontingjenteve të tjerë, vaksinat do të shpërndahen edhe në komuna të tjera.
Stafi shëndetësor i cili nuk është vaksinuar me vaksinën e kompanisë “AstraZeneca”, e pati mundësinë që këtë ta bëjë me atë të kompanisë “Pfizer”. Ata mohojnë të kenë hezituar për shkak të llojit të vaksinës, mirëpo, sipas tyre, kanë pasur probleme shëndetësore, përfshirë edhe infektimit me COVID-19.
“Kemi qenë të infektuar prej COVID kur ka qenë “AstraZeneca”, nuk ka pasur hezitim për mua është njësoj si “AstraZeneca” apo “Pfizer” se të gjitha janë të sigurta, po ashtu u preferojë të gjithë qytetareve që të e marrin e të mos hezitojnë”, është shprehur njëri nga anëtarët e personelit shëndetësor.
E një tjetër jep tjera arsye për mosmarrjen e vaksinës.
“Kemi pas do obligime edhe nuk kemi mujt me ardh nuk jemi frikësuar aspak”, thotë ai.
Në ditën e rifillimit të procesit të vaksinimit, Kosovën e ka vizituar Komisionari i Bashkimit Evropian për Fqinjësi dhe Zgjerim, Oliver Varhelyi. Ai ka qëndruar edhe në qendrën “1 Tetor” i shoqëruar nga kryeministri i Kosovës, Albin Kurti.
“Mendoj që ky është kontributi më i rëndësishëm që bëjmë për të ndihmuar, të fillojmë përfundimin e pandemisë, pasi që pandemia do të përfundojë vetëm pasi të jemi vaksinuar të gjithë. Dhe, ky është vetëm furnizimi i parë. Do të vazhdojmë të punojmë me kryeministrin për të siguruar më shumë vaksina në mënyrë që të vaksinohen të gjithë... Kjo për ne nënkupton se ne brengosemi për Ballkanin Perëndimor dhe brenda tij brengosemi për Kosovën” është shprehur Varhelyi.
E kryeministri i Kosovës, Albin Kurti, ka falënderuar çdo palë të përfshirë në procesin e sigurimit të vaksinave. Ai ka thënë se kjo është sasia e parë e kësaj pakoje të dërguar nga Bashkimi Evropian.
“Kjo sasi e parë e kësaj pako të dërguar nga Bashkimi Evropian përveç që është shpresëdhënëse na bënë që të kemi përkrahjen e BE për qytetarët tonë, kjo simbolikë me shumë vlerë na jep besimin se rrugëtimi jonë drejt BE-së është i mbushur me miq e që sot do falënderojë Austrinë. Vetëm duke qenë së bashku ne do ta fitojmë luftën kundër COVID, sot po e rifillojmë vaksinimin dhe të mos ndalemi që të arrijmë të vaksinojmë deri 60% të popullatës”, ka thënë ai, duke shtuar se Qeveria do të punojë në sigurimin e vaksinave.
Kosova deri më tani ka arritur të vaksinojë me dozën e parë rreth 24 mijë persona me vaksinën e kompanisë “AstraZeneca”, e ardhur donacion përmes mekanizmit COVAX. Rreth 5 mijë prej të vaksinuarve ishin staf shëndetësor, e të tjerët qytetarë të moshës mbi 75 vjeç.
© KOHA. Të gjitha të drejtat janë të rezervuara.
