Avokati i Popullit: Neglizhenca e shtetit çoi në vrasjen e 44-vjeçares Morina

Vrasja e Sebahate Morinës në mars të këtij viti nga burri i saj në Prishtinë, i cili më pas kishte vrarë edhe veten, sipas Avokatit të Popullit, është pasojë e neglizhencës së institucioneve të shtetit. Në raportin e këtij institucioni, për këtë çështje janë identifikuar një numër shkeljesh që hallkat e sistemit të drejtësisë kanë bërë në raport me viktimën, duke çuar në epilogun fatal.

“Nga analiza ligjore e këtij rasti shihet se situatë e njëjtë na paraqitet edhe në rastin që po trajtohet në këtë raport, pasi si pasojë e neglizhencës apo joprofesionalizmit të autoriteteve gjegjëse, si në rastin e parë kur viktima S.S. e kishte paraqitur rastin në Gjilan, si në rastin e dytë kur vajza e viktimës S.S. e kishte paraqitur rastin në Stacionin Policor në Graçanicë, viktima ishte përballur me neglizhencë apo joprofesionalizëm të autoriteteve, prandaj kjo ngjarje kishte epilog fatal”, thuhet në raportin e Avokatit të Popullit, i cili ka marrë të dhënat në të gjitha institucionet që kanë lidhje me rastin dhe ka listuar shkeljet.