Video

Rekomandohet autorizimi i KOSTT-it për mbulim me rrymë të veriut

Komisioni për Ekonomi ka rekomanduar autorizimin e KOSTT-it të mbuloj devijimet e energjisë elektrike në katër komunat e veriut, sipas zgjidhjes së prezentuar dhe miratuar në komisionin funksional duke shfrytëzuar të hyrat nga buxheti vetanak.

Këto mjete do të kompensohen nga dividenda apo ndonjë mekanizëm tjetër i mundshëm.

Por, ky propozim i deputetes Mimoza Kusari-Lila nxiti debat mes deputetëve anëtarë të komisionit.

Kryesuesi i Komisionit, Ferat Shala, ka kritikuar Qeverinë duke thënë se me këtë po rrezikohet stabiliteti i një ndërmarrjeje.

Por Kusari-Lila ka thënë se problemi me rrymën në veri është qe 20 vjet dhe se duhet me i dhënë Qeverisë afat 6 muaj.

“Mos me ju kthyer historisë shteti funksionon dhe të vjen qeveria me plan qeveritar dhe kur vendos që ne të kemi një treg të integruar të qeverisë dhe t’i mbledhim taksat në veri, unë nuk jam për me legalizua pagesën në këtë formë dhe ju mbështes për me ndërpre dhe unë po ja dha një afat qeverisë për me ndërpre këtë”, tha Ferat Shala, kryetar i Komisionit për Ekonomi.

“Keni pasur dje debat me KOSTT-in që ata i kanë propozuar këto zgjidhje dhe i ke thanë Bordit mos u kthe në histori, ata kanë propozuar që ne mundemi me ble rrymë me kopensu”, tha deputetja e Vetëvendosjes, Mimoza Kusari-Lila.

Opozita ka kërkuar që të mos ngarkohet KOSTT-i dhe Qeverisë t’i jepen vetëm tre muaj që të bëjë planin për shtrirje të inkasimit në veri.

PDK-ja në një konferencë për media ka thënë se pushteti i VV-së po ndan 11 milionë euro për rrymën e serbëve në veri, kurse i hoqi 30 eurot e pensionistëve.

Kjo parti ka filluar mbledhjen e nënshkrimeve për interpelancë rreth kësaj çështjeje.

Rekomandimi për autorizimin e KOSTT-it do të shqyrtohet edhe në seancë plenare, për të cilën do të vendosë Kryesia e Kuvendit.

E në mbledhjen e Komisionit është diskutuar edhe faturimi i rentës nga KEK-u ndaj “Kosova Thëngjillit”, nga ku Qeverisë iu kërkua të ndërhyjë dhe të zbatohet Ligji për rimëkëmbje për të gjithë.