Me 90 vota për Kuvendi i Kosovës ka miratuar plotësim-ndryshimin e Kodit të Procedurës Penale për lehtësimin e procedurave për gjykimin e krimeve në mungesë.
Por kjo çështje nuk kaloi pa akuza mes ministres aktuale të Drejtësisë, Albulena Haxhiu, dhe ish-ministrit Abelard Tahiri.
“Ministrja Haxhiu e përmendi që ka pak prokurorë për krime të luftës. Ka qenë Qeveria Kurti, e cila e ka shkurtuar buxhetin për këshillin prokurorial”, ka thënë Abelard Tahiri, deputet i PDK-së.
“Ju sa kohë keni qenë në pushtet nuk iu ka ra në mend me sjell drejtësi për krimet e luftës, e tash për ato që keni shkaktu për 20 vite po kërkoni zgjidhje për një muaj nga qeveria Kurti”, ka shtuar Albulena Haxhiu, ministre e Drejtësisë.
Pas takimit që Kurti ditë më parë pati me shefin e UNMIK-ut, deputeti i PDK-së, Fadil Nura, pati një pyetje për të.
“Krahas prioriteteve në takimin me shefin e UNMIK-ut, a shtruat cështjen e përgjegjësisë së vrasjes së Mon Balajt dhe Arben Xheladinit nëse po cila ishte përgjigja e tyre”, është shprehur Fadil Nura, deputet i PDK-së.
“Si kryeministër konsideroj që me UNMIK-un duhet te flasim për këtë cështje pasi që Prokuroria jonë të fillojë hetimet, qoftë edhe për gjykim në mungesë të atyre kriminelëve që kanë qenë në radhët e ushtrisë së UNMIK-ut”, është përgjigjur Albin Kurti, kryeministër i Kosovës.
Në këtë seancë kryeministri Kurti u kritikua se bëri fushatë dhe votoi në Shqipëri.
“Për dy javë ka vizituar Shqipërinë 4 herë e qendrën infektive asnjëherë. I bëj thirrje që punën e parë cdo mëngjes ta nisë nga QKUK-ja. 1000 pacientë për një Boiken nuk ia vlen, as ai si ka aq vota”, ka thënë Lumir Abdixhiku, kryetar i LDK-së.
Kritika ka pasur edhe nga PDK-ja e AAK-ja.
“E pamë që prioritet për të ishin zgjedhjet në Shqipëri dhe jo situata në Kosovë. Prioritet për të ishte Boikeni dhe jo qytetari i Kosovës”, ka deklaruar Uran Ismaili, deputet i PDK-së.
“Votimi i djeshëm i juaji nuk mendoj që e ka forcu demokracinë e Shqipërinë vetëm besoj e ka forcu mendimin për Kosovën të vendeve mosnjohëse”, ka kritikuar Besnik Tahiri, deputet i AAK-së.
Deputetët e PDK-së sërish kanë kritikuar ish-deputeten e tyre, Adelina Grainca, dhe ka në kërkuar nga ajo që t’ua kthejë mandatin.
Por asaj i doli në mbrojtje shefja e deputetëve të Vetëvendosjes, Mimoza Kusari-Lila.
“Për ta gruaja dhe deputetja është pronë që shitet dhe blihet”, ka thënë Kusari-Lila.
-
Nga: Marigona Brahimi
-
26 prill 2021 21:15
-
Shpërndaje në: