Pas 12 ditë mbylljeje të pjesshme, nga e hëna sektori i gastronomisë, me vendim të Qeverisë, ka nisur punën. Masat e Qeverisë, sipas përfaqësuesve të gastronomisë, kanë ndikuar jashtëzakonisht keq në këtë sektor. Gjatë kohës sa kanë zgjatur masat, kryetari i Shoqatës së Gastronomëve, Petrit Kllokoqi, thotë se kanë pësuar goxha humbje. Ai u ka bërë thirrje gastronomëve që t’i respektojnë në përpikëri masat në mënyrë që t’u shmangen mbylljeve të tjera që mund të jenë të papërballueshme për ta.
“Fitimet më të mëdha tonat janë në fillim të muajit kur njerëzit i marrin rrogat, domethënë në dy ditët e para e marrim kremin e biznesit. Ose së paku sa u përket shpenzimeve fikse, qirave, punëtorëve, shpenzimeve të ujit e të tjerat, ne i mbulojmë komplet me javët e parat të muajit. Ato na u ndërprenë dhe kuptohet që pas atyre ne po kalojmë direkt në periudhë të Ramazanit, ku e dimë që kërkesa agregate bie”, ka thënë ai.
Kllokoqi ka thënë se do t’i monitorojnë lokalet e gastronomisë për të parandaluar shkeljen e masave.
“E kemi një ekip monitorues të Shoqatës së Gastronomëve, e cila bën vizita të rregullta, kemi filluar edhe fushatën “gastro-shembull” ku i kemi printuar udhëzuesit për klientë dhe për lokale”, ka shtuar ai.
Ndonëse mbyllja ka ndikuar negativisht në bizneset, nga Ministria e Shëndetësisë nuk kanë treguar edhe për ndikimin që masat 12-ditëshe kanë pasur në shëndetin publik. KOHA ka provuar të marrë përgjigje nga ta lidhur me këtë çështje, por ata nuk janë deklaruar. Megjithatë, numri i rasteve të infektimit dhe i vdekjeve vazhdon të jetë i lartë. Në 24 orët e fundit kanë vdekur 14 persona nga koronavirusi, ndërsa 277 kanë rezultuar pozitivë. Infektologu Nderim Hasani thotë se nga 120 shtretër sa ka kapacitet Klinika Infektive, 111 janë të zënë.
“Aktualisht sot në Klinikën Infektive kemi 111 pacientë të hospitalizuar, nga të cilët pak mbi 100 janë me oksigjenoterapi, nga ta i kemi 7 të hospitalizuar me ventilim mekanik”, ka thënë Hasani.
Ai ka deklaruar se ka pasur një rënie të lehtë sa i përket numrit të të infektuarve, porse në Klinikë kanë mbetur pacientë me gjendje të rënduar.
“Shihet se numri i rasteve që vijnë për trajtim dhe hospitalizim është ulur, mirëpo ajo që mund të themi është se ne tash po ballafaqohemi me raste më të rënda”, ka deklaruar Hasani.
Nga e hëna edhe nxënësit në të gjithë vendin janë kthyer në bankat shkollore. Javën e kaluar arsimi i ulët fillor (I-V) ka vijuar mësimin në objektet shkollore, kurse pjesa tjetër pati vazhduar mësimin online sipas skenarit C. Ministria e Arsimit konfirmoi se mësimi ka nisur në të gjitha shkollat e vendit, përjashtim bëjnë vetëm shkolla “Meto Bajraktari” në kryeqytet për shkak të disa rasteve me COVID dhe shkolla “Ruzhdi Quliqi” në Marali të Malishevës. SBAShK-u sërish ka kërkuar nga Qeveria dhe dikasteret përkatëse që të kenë prioritet vaksinimin e personelit arsimor.
© KOHA. Të gjitha të drejtat janë të rezervuara.
