Mohues të historisë së re të Kosovës, trashëgimisë politike e luftës së Ushtrisë Çlirimtare e ka kualifikuar pushtetin aktual Partia Demokratike. Deputetja e këtij subjekti, Blerta Deliu-Kodra, ka kritikuar qasjen e presidentes Osmani e kryeministrit Kurti, derisa për ministren e Punëve të Jashtme, Donika Gërvalla, ka thënë se ishte në një vijë me Serbinë e Rusinë, kur në Këshill të Sigurimit përmendi krimin dhe korrupsionin në vend.
“Në vend se të dëgjojmë për rolin destruktiv të Serbisë në zgjedhjet në Kosovë, manipulimet e votave të pakicave, Qeveria e re ka vendosur ta amnistojë Beogradin në arenën ndërkombëtare. Në vend se të dëgjojmë për gjuhën fyese të Vulinit ndaj shqiptarëve, Qeveria e re ka vendosur që ta paraqesë Kosovën ashtu siç do Vulini dhe të tjerët në Beograd. Tendencë të hapur të pushtetit, nga presidentja, kryeministri e ministrat, për të mohuar historinë më të re të Kosovës, trashëgiminë politike, luftën çlirimtare dhe vlerat tona kombëtare”, ka thënë deputetja e PDK-së, Blerta Deliu-Kodra.
Sipas saj, ministrja e Jashtme nuk e shfrytëzoi paraqitjen në OKB për afirmim të shtetësisë së Kosovës.
“Nëse përfaqësuesi britanik në OKB thotë që Kosova ka bërë progres të paparë në këto 20 vjet, pse një fjalë të tillë s’mund të thotë edhe ministrja e Jashtme e Kosovës?! Nëse përfaqësuesi amerikan kërkon mbylljen e misionit të UNMIK-ut dhe uron Kosovën për njohjen nga Izraeli, pse një fjalë të tillë s’mund ta thotë ministrja e Jashtme e Kosovës”, ka shtuar ajo.
Deliu ka kritikuar edhe presidenten Osmani për mospërmendjen e ish-presidentit Hashim Thaçi, në takimin e zhvilluar me ish-presidentët tjerë.
