Video

Ekzekutivit i kërkohet të nisë lobimin për anëtarësim në organizata ndërkombëtare

 

Moratoriumi njëvjeçar që Kosovës ia ndalon të kërkojë të anëtarësohet në organizata ndërkombëtare është në fuqi deri në shtator, por Qeverisë po i kërkohet që deri atëherë ta nisë lobimin. Njohës të së drejtës ndërkombëtare kanë thënë se këta pesë muaj të mbetur, Kosova nuk duhet të rrijë duarkryq, por të përgatitet për anëtarësim kur kufizimi të skadojë. Megjithëse kryeministri Albin Kurti e ka kritikuar Marrëveshjen e Washingtonit, e cila solli moratoriumin, Qeveria nuk është deklaruar sa i përket kësaj çështjeje

Qeveria nuk dihet se çfarë e ka në plan të bëjë me disa nga pikat e Marrëveshjes së Washingtonit, të nënshkruar nga ish-kryeministri Avdullah Hoti. Kjo vlen veçanërisht për pjesën ku Kosovës i kërkohet që për një vit t’i ndalojë kërkesat për anëtarësim në organizata ndërkombëtare.

Nga ekzekutivi është thënë se për këtë çështje nuk mund të përgjigjen të shtunën. Megjithatë, këtë marrëveshje e ka kritikuar vazhdimisht Albin Kurti, i cili pak ditë para se të zgjidhej kryeministër ka thënë se pika e moratoriumit bie ndesh me Kushtetutën.