Rreth tetë mijë biznese të gastronomisë e hotelerisë të mërkurën janë mbyllur, konform masave të Qeverisë për parandalimin e përhapjes së koronavirusit.
Për humbjet eventuale që bizneset mund t’i kenë në ditët e ardhshme, ministri i Financave, Punës dhe Transfereve, Hekuran Murati, ka thënë se Qeveria do t’ua kompensojë atyre me subvencionim të pagave të punëtorëve dhe qirasë.
Gjatë një konference për medie, ai ka sqaruar se ideja ka qenë në mbështetje të shpenzimeve fikse, porse ka dallime në mes të sektorëve dhe për këtë do të ketë dizajnim më specifik për masat konkrete mbështetëse.
“Ideja kryesore apo në vija të trasha është që të mbështeten qiratë, pra shpenzimet fikse, si dhe pagat e punëtorëve. Synimi ynë si MFPT do të jetë që të ruhet shëndeti ekonomik, por pikësëpari të ruhen vendet e punës”, ka thënë Murati.
Megjithatë, shuma e mjeteve për këtë mbështetje ende nuk është përcaktuar nga Qeveria dhe, sipas Muratit, arsyeja është pasi që ende nuk janë kompletuar të dhënat e bizneseve përfituese. Kjo, si ka thënë ai, do të marrë kohë edhe disa ditë.
“Sa i përket se nga sigurohen mjetet, ka mundësi që brenda përbrenda kufijve buxhetorë që i kemi të merren mjete nga programe të caktuara dhe të shfrytëzohen për këtë mbështetje”, ka deklaruar ai.
Megjithatë, sipas ekonomistëve, kjo masë si e vetme nuk do të jetë e mjaftueshme. Ish-kryetari i Odës Ekonomike të Kosovës, Safet Gërxhaliu, ka thënë se e nevojshme do të jetë edhe një pako e rimëkëmbjes.
“Duhet një fond gjithëpërfshirës, i cili do ta mbështesë edhe gastronominë, edhe sallat e dasmave, edhe hotelet, e edhe transportin publik. Prandaj Kosovës i duhet një infuzion financiar si ndihmë për sektorin privat, sepse deri më tani është bërë shumë pak. Kosovës i duhen dy vjet për rimëkëmbje. Kosovës i duhet ndihmë më konkrete dhe gjithëpërfshirëse”, ka thënë ai.
Në konferencën për medie Murati pohoi se do të ketë pako të rimëkëmbjes më gjithëpërfshirëse, porse ajo do të vijë tek pas kalimit të gjendjes emergjente.
“Jemi në një situatë emergjente dhe ideja është që të marrim kundërveprime për ata sektorë që ndikohen nga masat. Pakoja e rimëkëmbjes do të vijë dhe do të ketë mbështetje shumë më të gjerë dhe këtu duhet të shihet edhe në afate më afatgjate. Pako të rimëkëmbjes do të ketë tek pas kalimit të gjendjes emergjente”, ka deklaruar ai.
Masat për pezullimin e aktivitetit të gastronomisë e qendrave tregtare do të zgjasin nga 7 deri më 18 prill.
© KOHA. Të gjitha të drejtat janë të rezervuara.
