Situata me pandeminë COVID-19 bëri që në ceremoninë zyrtare të marrjes së detyrës, presidentja Vjosa Osmani të mos ketë shumë të ftuar.
Në ceremoninë e mbajtur dy ditë pas pranimit të detyrës, Osmani erdhi e shoqëruar me eskortë e policë.
Së bashku me kryetarin e Kuvendit, Glauk Konjufca, ajo parakaloi para gardës ceremoniale të FSK-së.
Në fund të parakalimit, Osmani nga Konjufca pranoi Kushtetutën e Kosovës, për të vazhduar më pastaj pranë mysafirëve të ftuar, e të cilët ishin të paktë në numër.
Përveç ambasadorit të SHBA-së e atij të Italisë, pjesë e ceremonisë ishte edhe kryeministri Albin Kurti, i shoqëruar nga një pjesë e kabinetit qeveritar e nënkryetarja e Kuvendit, Saranda Bogujevci.
Ceremonia e mbajtur në sheshin “Ibrahim Rugova” nuk shënoi përmbylljen e aktiviteteve, me të cilat Osmani do të shënonte pranimin e detyrës së të parës së shtetit.
Ndër mysafirët e parë që presidentja priti të zyrë, ishte ekipi i xhudistëve të Kosovës.
Në krye me Majlinda Kelmendin, xhudistët thanë që shpresojnë se presidentja do të jetë krah tyre në Lojërat Olimpike, nga të cilat synojnë të sjellin edhe medalje.
Pas xhudistëve, Osmani takoi edhe nxënësit e institutit Atomi.
Nga Presidenca Osmani vazhdoi aktivitetet e saj në Qendrën e vaksinimit në Prishtinë, e bëri homazhe te varri i ish-presidentit Ibrahim Rugova.
Derisa vendosi lule te Memoriali për nder të të pagjeturve, Osmani premtoi se fati i tyre do të jetë një nga prioritetet e dialogut me Serbinë.
“Jo vetëm që ky duhet të jetë prioriteti numër një në dialogun ndërmjet Republikës së Kosovës dhe Serbisë, por në anën tjetër, po ashtu, angazhim i çdoditshëm institucional i secilit prej nesh”, deklaroi presidentja Osmani.
Lule, presidentja Vjosa Osmani vendosi edhe te Monumenti i Heroinave, derisa bëri homazhe edhe në Kompleksin Memorial “Adem Jashari”.
Në krye të shtetit, Osmani është zgjedhur të dielën, derisa pas tri raundesh votimi, arriti të marrë 71 vota në favor të saj.
Detyrën e presidentes, Vjosa Osmani, si kryetare e Kuvendit e ushtroi për pesë muaj, që nga dorëheqja e ish-presidentit Hashim Thaçi në nëntor, e deri te dorëzimi i detyrës te Glauk Konjufca në fund të marsit.
© KOHA. Të gjitha të drejtat janë të rezervuara.
