Mbyllja e gastronomisë dhe qendrave tregtare në 12 ditët e ardhshme, si dhe kufizimi i lëvizjes së qytetarëve nga ora 22:00 deri në orën 5:00 të mëngjesit kanë qenë vetëm disa nga masat e marra nga Qeveria këtë të hëne.
Rritja e trendit të vdekjeve dhe e të infektuarve gjatë muajve të fundit dhe përhapja e shumëfishtë e variantit të ri me Covid-19 ka bërë që Ekzekutivi kosovar të ndërpresë punën e gastronomisë nga 7 prilli deri më 18 prill, derisa atyre u është lejuar vetëm shërbimi “merr me vete”.
Nga 7 prill institucionet publike dhe private, sipas vendimit të Qeverisë, obligohen të punojnë vetëm me staf esencial.
Po ashtu janë ndaluar rreptësishtë organizimi i të pameve, ndërsa në ceremonitë e varrimit do të lejohen vetëm anëtarët e ngushtë të familjes.
Me këtë vendim ndalohet grumbullimi i qytetarëve me rrezikshmëri të lartë të shpërndarjes së infeksionit me më shumë se 10 persona, derisa transporti publik do të punojë me 50 për qind të kapaciteteve.
Megjithatë vendimi i Qeverisë ka lejuar aktivitetet sportive profesionale në hapësira të mbyllura dhe të hapura.
E numri i lartë i përqindjes së mostrave të konfirmuara me variantin e ri britanik paraqet shqetësim tjetër për situatën epidemiologjikë në vend.
Ministri i Shëndetësisë, Arben Vitia, ka thënë se ky variant përhapet shumëfish më shpejt dhe po sulmon më shumë të rinjtë.
Vitia ka pranuar se fushata zgjedhore gjithashtu ndikoi në trendin e rritjes.
“Një pjesë tjetër e qytetarëve më të drejtë kanë fajësuar fushatën elektorale për rritjen e rasteve të infektimit. Edhe kjo është e vërtetë. Çfarëdo tubimi masiv është super shpërndarës. Por duhet kuptuar se jeta dinamike shpeshherë ndikohet edhe nga faktorë të paparashikuar”, ka thënë ai.
Ndërsa kryeministri Albin Kurti shifrat e të infektuarve dhe të vdekjeve i ka quajtur trendë të frikshëm që, sipas tij, mund të ulen vetëm duke ndërmarrë dhe respektuar masat .
“Siç jemi në dijeni në këta dy muajt e fundit, kemi pasur afër gjysmë milioni testime për COVID-19, në këto dy javët e fundit kemi një trend të frikshëm të rritjes ku, janë disa qindra deri afër njëmijë raste të reja në ditë dhe mbi 10 të vdekur mesatarisht”, ka th, ka thënë Kurti.
Sipas hulumtimeve dhe gjurmimeve të IKSHPK-së del se shpërndarës të mëdhenj të infeksionit janë: gastronomia, institucionet publike, puna në zyra e vende të përbashkëta, qendrat tregtare, shkollat, grumbullimet e personave në rastet e vdekjeve dhe të ahengjeve.
Vetëm gjatë dy javëve të fundit janë raportuar mbi 11 mijë raste pozitive me Covid-19, ku 150 persona kanë vdekur.
© KOHA. Të gjitha të drejtat janë të rezervuara.
