Për më pak se një muaj, numri i pacientëve me koronavirus që kanë kërkuar trajtim në Shërbimin Klinik Universitar të Kosovës është rritur për 340.
Sipas raporteve të SHSKUK-së, më 1 mars në trajtim kanë qenë 528 pacientë, kurse 25 ditë më vonë, ky numër ka arritur në 868.
Me fluks të madh të pacientëve po përballet edhe Klinika e Pulmologjisë, e cila bashkë me atë të Dermatologjisë aktualisht kanë vetëm 7 shtretër të lirë.
“Kërkesat për vizita ambulantore dhe hospitalizime kanë qenë më të mëdha. Për shembull vetëm ditën e djeshme kemi pasur diku 163 vizita ambulantore, edhe sa i përket kërkesave për hospitalizime janë këto ditë më të mëdha”, ka thënë Musa Hoxha, drejtor i Klinikës së Pulmologjisë.
Shifra të larta janë regjistruar edhe në 24 orët e fundit, ku 6 persona kanë vdekur nga COVID-19, kurse janë identifikuar 860 raste të reja pozitive.
Në spitalet e përgjithshme janë të shtrirë 516 pacientë. Situata vlerësohet e rënduar në Spitalin e Gjakovës, ku nga 135 shtretër, të lirë janë vetëm 35 prej tyre.
“Për shkak të gjendjes së renduar dhe për shkak të punës sistematike, 3 prej mjekëve kanë rezultuar pozitiv dhe janë në trajtim, dikush mjekim shtëpiak e dikush në repartet e trajtimit të Covidit, 4 infermierë dhe 2 staf teknik. Ajo që e ka rënduar edhe më shumë situatën është trajtimi i pacientëve që vijnë nga Republika e Shqipërisë”, ka deklaruar Afrim Sylejmani, ushtrues detyre i drejtorit shëndetësor të këtij spitali.
Me gjithë paralajmërimet e shumta që klinikat e QKUK-së e spitalet rajonale janë drejt kolapsit shkaku i numrit të madh të pacientëve, Kosova vazhdon të mos ketë kufizime të ashpra për ta parandaluar përhapjen e COVID-19.
© KOHA. Të gjitha të drejtat janë të rezervuara.
