Rritja e konkurrencës ekonomike pas pandemisë Covid-19, sipas Këshillit të Investitorëve Evropianë, do të jetë sfidë për Kosovën dhe se Qeveria e re duhet të ketë prioritet ndryshimet thelbësore ekonomike dhe sociale.
Në konferencën “Rritja e konkurrencës ekonomike të Kosovës në periudhën pas Covid-19”, zëvendësshefi i Zyrës së BE-së, Riccardo Serri, ka thënë se kriza e tanishme është e tmerrshme dhe se duhet vullnet politik për të adresuar sfidat ekonomike.
“Kjo nuk do të jetë e lehtë, nënkupton ndryshime thelbësore ekonomike dhe sociale për të cilat Kosova duhet të marrë përgjegjësi. Duhet të ketë po ashtu vullnet politik për të adresuar këto sfida. Kosova ka qeveri të re, kështu që ju uroj çdo të mirë. Dhe i uroj qeverisë në marrjen e përgjegjësive për të çuar përpara agjendën të cilën po e diskutojmë sot në këtë debat”, ka thënë Serri.
Kryetari i Bordit të Këshillit të Investitorëve Evropianë, Visar Ramajli, theksoi se Kosova mund ta rimodelojë strukturën ekonomike, duke lëvizur nga tregtia drejt industrisë.
“Kosova, burimin më të mirë të saj e ka rininë dhe ne duhet ta shfrytëzojmë këtë pasuri për ta çuar ekonominë përpara, si veçanërisht duke u përqendruar në industri. Shpresojmë se do të jemi pjesë e iniciativës së BE-së pas pandemisë për të formësuar industrinë e saj”, është shprehur Ramajli.
Ndërsa Jeton Zulfaj, nga Zyra e Kryeministrit ka thënë se avancimi i raporteve të Kosovës me BE-në mbetet prioritet kryesor i Qeverisë dhe se pengesat e padrejta duhet të largohen.
“Pengesat e padrejta duhet të hiqen, për të pasur shkëmbim plotësisht të lirë. BE mbetet investitori më i madh në Kosovë. Më 2019, investimet direkte ishin sikur ato të vitit paraprak, një vlerë prej 272 milionë euro apo 4 për qind të PBB-së. Kryeministri ka bërë thirrje që të investohet në industrinë minerare, në mënyrë të përgjegjshme, duke ruajtur ambientin, sepse Kosova është e pasur me minerale”, ka thënë ai.
Nga aty iu bë ftesë investitorëve që të investojnë në sektorin e turizmit dhe në fushën e teknologjisë informative, sektorë këta që kanë potencial për zhvillim.
© KOHA. Të gjitha të drejtat janë të rezervuara.
