Hapësira e Shtëpisë së Kulturës në Kukës është shndërruar në qendër vaksinimi, vetëm për punonjësit shëndetësorë kosovarë.
Në mënyrë të organizuar, paraditen e së shtunës, punonjës nga shumica e komunave të Kosovës, kanë mbërritur në Shqipëri, për ta marrë dozën e parë të vaksinës kundër COVID-19.
E falënderimet për shtetin shqiptar nuk munguan, derisa kërkohej që edhe Kosova ta nisë sa më parë vaksinimi.
Për ta parë procesin nga afër ishte edhe kryeministri i Shqipërisë Edi Rama, që premtoi se përveç 500 personave që do të vaksinohen këtë fundjavë, Kosovës do t’i ofrohen edhe doza të tjera të vaksinës.
Rama tha se shkaku i marrëveshjeve me kompanitë prodhuese, nuk mund t’i transportojnë në Kosovë këto vaksina.
Derisa Kosova mbetet një ndër vendet e pakta të në të cilën nuk është administruar asnjë dozë e vaksinës, shteti shqiptar u ka mundësuar punonjësve shëndetësorë, që janë në vijën e parë të frontit të betejës ndaj Covid-19, të vaksinohen në Shqipëri.
© KOHA. Të gjitha të drejtat janë të rezervuara.
