Shqetësuese është konsideruar rritja e shpejtë e rasteve spitalore ditëve të fundit, derisa është paralajmëruar mundësia e kolapsit të sistemit shëndetësor.
Në mbledhjen e radhës të Komitetit për menaxhimin e pandemisë, Valbon Krasniqi, drejtor i SHSKUK-së, ka thënë se nëse vazhdohet me këtë të numrit të rasteve, klinikat e QKUK-së e spitalet regjionale së shpejti nuk do të mund ta përballojnë gjendjen.
Krasniqi ka treguar se në nivel vendi, janë duke u trajtuar rreth 800 pacientë, 500 prej të cilëve me oksigjenoterapi.
Në këtë mbledhje, ku nuk u mor asnjë vendim, ministri në detyrë i Shëndetësisë, Armend Zemaj, e drejtori i IKSHPK-së kanë bërë thirrje për respektim të masave në fuqi.
Por, këtu u propozua, ndonëse nuk u vendos për një gjë të tillë, që sistemi arsimor të shkojë në pushim një-javor dhe pastaj të vlerësohet situata pandemike, duke kërkuar që nëse merren masa për mbyllje, kjo të jetë për të gjithë sektorët.
Ndërkohë, bizneset e gastronomët kanë kërkuar që t’u falen një pjesë e dënimeve si shkak i gjendjes së rënduar ekonomike, derisa kanë kundërshtuar masat që do të çonin deri në mbyllje të ekonomisë së vendit.
Në fund të këtij takimi, Zemaj foli edhe në lidhje me vaksinën kundër COVID-19, duke thënë se i kanë bërë të gjitha përgatitjet e nevojshme dhe se janë në pritje të kontingjentit të premtuar nga mekanizmi COVAX.
© KOHA. Të gjitha të drejtat janë të rezervuara.
