Të hapur e ka lënë mundësinë Lidhja Demokratike e Kosovës për pjesëmarrjen në votimin e zgjedhjes së kandidates për presidente, Vjosa Osmani.
Kryetari i ri i LDK-së, Lumir Abdixhiku, ka thënë se për një gjë të tillë do të vendosin pas takimit me Albin Kurtin e Vjosa Osmanin dhe pasi të koordinohen me organet e partisë.
“LDK synon t`i shmangë zgjedhjet, ky është synimi i parë. LDK synon të kontribuojë në formimin e institucioneve dhe LDK-ja synon që këto institucione të jenë demokratike, pra t`i përfaqësojnë të gjitha partitë politike, në veçanti pozita e presidentit apo presidentes”, ka thënë Abdixhiku.
Por, kundër votimit të Osmanit është deklaruar bashkëpartiaku i Abdixhikut, Avdullah Hoti.
“Ne nuk votojmë asnjë president, ne jemi parti opozitare dhe do të bëjmë opozitën tonë në Kuvend. I takon shumicës parlamentare që të bëjë konsultimet e nevojshme për të zgjedhur një person që paraqet unitetin”, ka deklaruar Hoti.
Në votimin e Osmanit për presidente nuk do të marrin pjesë deputetët e Partisë Demokratike e Kosovës. Kryetari i saj, Enver Hoxhaj, ka thënë se kandidatura e saj është e papranueshme.
“Ne nuk e mbështesim kandidaturën e saj, nuk votojmë për të, nuk marrim pjesë në votim. Prandaj, çështje të tilla, qëndrimi apo jo në sallë, janë të natyrës teknike”, është shprehur Hoxhaj.
Lidhur me këtë çështje nuk ka pranuar të japë përgjigje i pari i Aleancës për Ardhmërinë e Kosovës, Ramush Haradinaj.
“Sikurse e dini, seanca e parë është konstituimi i Kuvendit dhe po, do të jemi pjesë e kësaj seance. Pastaj. për çdo seancë do të diskutojmë veç e veç, pra për çdo temë të rendit të ditës ose atë që janë obligime të grupit parlamentar, por nuk e kam përgjigjen sot”, ka thënë Haradinaj.
Këto deklarime, krerët e subjekteve politike në vend i kanë bërë pas takimit që kanë pasur këtë të enjte me zëvendëskryeministrin e Maqedonisë së Veriut, Artan Grubi.
KOHA ka provuar të kontaktojë me Listën Serbe lidhur me çështjen e pjesëmarrjes në votim të presidentit të Kosovës, por të enjten përfaqësues të saj nuk kanë qenë të qasshëm.
Lidhur me zgjedhjen e presidentit, KOHA nuk ka arritur të marrë përgjigje nga Lëvizja Vetëvendosje.
Sipas rezultateve të KQZ-së, Lëvizja Vetëvendosje do t’i ketë 58 deputetë. Përkrahjen për zgjedhjen e kandidates së Vetëvendosje për presidente, deri më tani, e kanë konfirmuar rreth 8 deputetë nga komunitetet joserbe.
Por, megjithëkëtë, Vjosa Osmanit do t’i duhet edhe pjesëmarrja në votim e rreth 15 deputetëve të tjerë, në mënyrë që të zgjidhet presidente në njërin nga tre raundet.
Sipas Kushtetutës, presidenti i vendit zgjidhet me 2/3 e votave të të gjithë deputetëve. Nëse një gjë e tillë nuk arrihet në raundin e parë dhe të dytë, atëherë kreu i shtetit mund të zgjidhet edhe nëse merr 61 vota. Por, siç ka specifikuar Gjykata Kushtetuese më mars të 2011-s, një gjë e tillë mund të bëhet vetëm me kushtin që në votim të marrin pjesë 80 deputetë.
© KOHA. Të gjitha të drejtat janë të rezervuara.
