Fiks një muaj pas debaklit më të madh zgjedhor të LDK-së, Lumir Abdixhiku ka marrë timonin e partisë, me premtimin se do ta unifikojë atë.
Përderisa 14 shkurti shënoi rënien e madhe, 14 marsi është parë si shpresë për ringritje.
“Rruga përpara kërkon reformë, dhe reformë do të ketë. Skeptikët do t’i bindim se LDK-ja do të mbetet edhe Lidhje, edhe Demokratike, edhe e Kosovës...”, ka thënë Abdixhiku.
Abdixhiku e ka fituar garën pa balotazh me 190 vota të delegatëve, duke lënë pas Lutfi Hazirin me 110 vota e Besian Mustafën që mori vetëm 16 sosh.
Derisa kandidatët kishin vendosur të mos i paraqisnin platformat e tyre në fillim të mbledhjes, Abdixhiku si kryetar i zgjedhur i ka ftuar për fjalë Hazirin dhe Mustafën.
“Sot me vendimin ju dëshmuat se të gjitha ato vlerësime kanë rënë përtokë, LDK-ja është më e madhe, është standard politik, është shkollë politike. Është vetë shteti i Kosovës për të cilin kemi punuar pa u ndalë. Kryetari më i ri i skenës politike e rinon LDK-në”, ka thënë Lutfi Haziri, kandidat për kryetar të LDK-së.
“Nga sot mua, Lutën dhe të gjithë anëtarët e LDK-së na ke ushtarë të këtij misioni”, ka thënë Besian Mustafa, kandidat për kryetar të LDK-së.
Para fillimit të Kuvendit kandidaturën e tërhoqi Anton Quni, me arsyen se cilido që fiton prej tre kandidatëve, garanton drejtim të duhur për LDK-në.
Para votimit, Isa Mustafa që udhëhoqi për 11 vjet LDK-në dha dorëheqje të parevokueshme.
Me gjithë humbjen e thellë në zgjedhjet e 14 shkurtit, e cila ishte vazhdimësi e humbjeve të tij në të gjitha zgjedhjet parlamentare, Mustafa nuk është pishman për vendimet që ka marrë.
“Për vendime të mira unë konsideroj se të gjitha vendimet i kemi marrë si të arsyeshme, që kanë pasur objektiv interesin e vendit. Vendimi për prishje të koalicionit me VV-në është një vendim i mirë, sepse ndërmjet partneritetit me SHBA-në dhe qëllimeve dhe orientimeve të VV-së unë kam zgjedhur që të kem partneritetin me SHBA-në. E kemi paguar këtë çmim, por e kemi paguar me qëllim”, ka thënë Isa Mustafa, ish-kryetar i LDK-së.
E ish-kryetari tjetër, Fatmir Sejdiu, ka kërkuar në fillim të Kuvendit Zgjedhor shpalljen e zgjedhjeve të jashtëzakonshme në të gjitha strukturat e LDK-në. Por kërkesa nuk është miratuar.
Nga kryetari i ri pritjet janë që të garantojë reformim dhe gjithëpërfshirje në procesin e vendimmarrjes në LDK.
Mandati i kryetarit të ri i dalë nga Kuvendi i Jashtëzakonshëm i LDK-së është dy vjet.
Përveç zgjedhjes së kryetarit, të dielën është bërë edhe konstituimi i Këshillit të Përgjithshëm të LDK-së.
© KOHA. Të gjitha të drejtat janë të rezervuara.
