Kosova po vazhdon të përballet edhe më tutje me shifra të larta të të infektuarve me koronavirus.
Vetëm gjatë 24 orëve të fundit, nga 2 mijë e 532 persona të testuar me metodën PCR dhe rapid, 568 persona kanë rezultuar pozitivë, e që është shifra më e lartë për vitin 2021.
Derisa, edhe 4 raste të vdekjes janë regjistruar, duke e çuar totalin në 1 mijë e 620.
Edhe këtë të mërkurë, Instituti Kombëtar i Shëndetit Publik ka bërë thirrje për respektim të distancës e vendosje të maskës, duke kërkuar që të mos grumbullohen shumë persona.
IKSHPK-ja, në apelin e tyre, ka thënë se shifrat e të infektuarve mund të rriten ditëve në vazhdim.
E pikërisht situata me pandeminë është çështja që do të diskutohet në takimin e Komitetit për menaxhim të situatës të enjten.
Në një përgjigje me shkrim nga Ministria e Shëndetësisë, nuk kanë dhënë detaje nëse do të ketë ose jo shtrëngim të masave, duke thënë se masat aktuale mbesin në fuqi.
“Tash për tash nuk ka asnjë masë të re përveç atyre që janë në fuqi. Nesër mbahet Komiteti për vlerësim dhe koordinim të situatës rreth COVID-19 për të diskutuar situatën epidemiologjike në vend sa i përket COVID-19, në të cilën institucionet e ndryshme raportojnë rreth aktiviteteve që janë duke u zhvilluar dhe situatës në përgjithësi”, thuhet nga MSH-ja.
E paralajmërimin për shtrëngim të masave kundër COVID-19, po e kundërshtojnë gastronomët, të cilët kanë paralajmëruar protestë për të hënën.
Shoqata e Gastronomëve ka paralajmëruar edhe protesta të tjera dhe mosrespektim të masave të vendosura nga institucionet, duke thënë se fushata zgjedhore ndikoi në rritjen e numrit të rasteve e jo ata.
© KOHA. Të gjitha të drejtat janë të rezervuara.
