Fillimi i javës së ardhshme do ta gjejë në Kosovë përfaqësuesin e posaçëm të Bashkimit Evropian për dialogun Kosovë-Serbi, Miroslav Lajçak.
Vizitën e tij ai do ta nisë të hënën në Kosovë, derisa do të qëndrojë tri ditë. Sipas njoftimit nga Zyra e Bashkimit Evropian, Lajçak do të takohet me udhëheqësit politikë në vend.
Pas Kosovës, Lajçaku do të udhëtojë për në Serbi, derisa turneun do ta përmbyllë me vizitën në Malin e Zi, më 4 dhe 5 mars.
“Përfaqësuesi i posaçëm i Bashkimit Evropian për dialogun Kosovë - Serbi dhe çështje të tjera rajonale të Ballkanit Perëndimor, Miroslav Lajçak, do ta vizitojë Ballkanin Perëndimor në javën e parë të marsit. Duke filluar vizitën e tij në Kosovë nga 1 deri më 3 mars, ai do të vazhdojë vizitën në Serbi nga 3 deri më 4 mars dhe gjithashtu do ta vizitojë Malin e Zi si pjesë e mandatit të tij rajonal nga 4 deri më 5 mars. Z. Lajçak planifikon të takohet me udhëheqjen politike të të tre partnerëve të Ballkanit Perëndimor, si dhe me përfaqësuesit e Bashkimit Evropian në terren”, thuhet në sqarimin e BE-së.
Lidhur me vizitën e tij në Kosovë, KOHA ka provuar të marrë një qëndrim nga Zyra e Presidentit e Qeveria. Por gjatë të premtes nuk ka marrë përgjigje.
Vizita e Lajçakut në Kosovë e rajon nga “Demokraci Plus” është duke u parë si tentativë e tij për vazhdimin e mandatit.
Emir Abrashi, hulumtues në këtë organizatë, thotë se është koha që institucionet në vend të kërkojnë që emisarit evropian të mos i vazhdohet mandati, i cili i përfundon në prill, për shkak të qëndrimeve të tij të njëanshme.
“Në këtë fazë qeveria në detyrë, por edhe fituesit e zgjedhjeve duhet të mundohen me aleatët tanë brenda BE-së që të negociojnë për mos vazhdimin e mandatit të Lajçak por të zëvendësohet me një figurë tjetër”, ka thënë ai.
Një ditë më parë, përveç vizitës së Lajçakut në Kosovë e Serbi, mediat serbe kanë raportuar edhe për një vizitë të mundshme të zv.dihmëssekretarit amerikan Matthew Palmer.
KOHA të premten ka provuar të konfirmojë një gjë të tillë nga Departamenti i Shtetit Amerikan, por nuk ka marrë përgjigje.
© KOHA. Të gjitha të drejtat janë të rezervuara.
