Janë duke i bërë përgatitjet e fundit për ta pritur inspektimin e komandantes supreme.
Derisa gjithçka është gati për nisjen e manifestimit qendror të përvjetorit të 13-të të Pavarësisë, në kazermën “Adem Jashari” arrin ushtruesja e detyrës së presidentes, Vjosa Osmani.
Së bashku me komandantin e FSK-së, Rrahman Rama, ajo parakalon para njësiteve të ushtrisë. Në fjalën e saj para ushtarëve të FSK-së, Osmani shprehet se përkundër punës së bërë ende nuk është arritur perspektiva e kënaqshme për rininë e Kosovës.
“Ne nuk duhet të prodhojmë brez të ri të mërgimtarëve, por brezin e ri të njerëzve që kontribuojnë për vendin e tyre. Është koha që njerëzit tanë, rinia jonë të jetë e gatshme të kontribuojnë për vendin tonë, të jetë në shërbim të shtetit dhe qytetarëve të tij, ashtu siç jeni secili prej jush”, ka thënë ushtruesja e detyrës së presidentes, Vjosa Osmani.
Pas Osmanit, përmes një fjalimi shumë më të shkurtër, edhe kryeministri Avdullah Hoti thotë se mbesin punë të shumta për t’u bërë.
“Pavarësia e Kosovës është një ëndërr e gjeneratave që sakrifikuan çdo gjë, ndërkohë që mbetet shumë punë për të realizuar aspiratën për integrimet euroatlantike të Kosovës. I tillë ishte vizioni dhe amaneti i heronjve tanë të cilët na ndryshuan rrugën me luftën çlirimtare”, ka thënë Hoti.
Ndonëse gjatë manifestimit komunikimi mes tyre ishte i ftohët, Hoti e Osmani bënë thirrje për unitet.
“Sot vendit tonë i duhet solidaritet, unitet, e kohezion institucional, sepse projekti për shtetin sovran të pavarur e demokratik vazhdon ende. Para nesh kemi sfida të cilat do ta trasojnë jo vetëm durimin e përmbajtjen, por edhe gatishmërinë tonë që problemet e hapura t’i mbyllim me maturi e gjithherë në interes të vendit tonë, sovranitetit tonë, e qytetarëve tanë”, ka thënë Osmani.
“Edhe në këtë përvjetor, kujtimi dhe mirënjohja na bëhet udhërrëfyes që na jep forcë për të ngritur flamurin e Kosovës përkrah vendeve më të fuqishme, për të garantuar paqe dhe siguri në misionet paqeruajtëse ndërkombëtare”, ka shtuar Hoti.
Pjesë e manifestimit qendror për shënimin e Përvjetorit të Pavarësisë së Kosovës ishin edhe përfaqësues të familjeve Jashari e Rugova, si dhe të misioneve diplomatike.
© KOHA. Të gjitha të drejtat janë të rezervuara.
