Video

Fitoren e VV-së, Isa Mustafa e quan populiste dhe jo të mirë për vendin

Populist dhe jo të mirë për Kosovën e ka quajtur kryetari në dorëheqje i LDK-së, Isa Mustafa, rezultatin e zgjedhjeve të së dielës.

Ka thënë se për të është e vështirë të shpjegojë rezultatin e dobët të LDK-së, derisa ka shtuar se në të nuk ka ndikuar largimi i Vjosa Osmanit, pasi sipas tij, votat e partisë i kanë shkuar Lëvizjes Vetëvendosje.

“Gjithsesi edhe për këtë rezultat mendoj sepse asnjëherë politikat populiste asnjë vendi demokratik nuk i kanë shërbyer. Kanë vendosur qytetarët, nuk e vëmë në pikëpyetje vendimin e tyre, por që besoj që i kemi bërë mirë Kosovës me këtë rezultat unë nuk besoj”, ka deklaruar Isa Mustafa, kryetar në dorëheqje i LDK-së.

Pas mbledhjes me kryetarët e degëve të LDK-së, Mustafa ka thënë se asnjëri prej tyre nuk do të dorëhiqet deri në mbajtjen e Kuvendit Zgjedhor që pritet të mbahet pas disa javësh.

As ndonjë emër si kandidat për kryetar, sipas Mustafës, nuk është diskutuar.

Të hënën pas ofrimit të dorëheqjes nga Mustafa, janë shfaqur publikisht pakënaqësi brenda njërës prej degëve më të mëdha të LDK-së në Prishtinë, asaj të lagjes “Kodra e Trimave”.

Dorëheqjen e kryetarit të degës së parë në kryeqytet, Ismet Beqiri e kanë kërkuar disa anëtarë të kryesisë së degës.

"Është mbi 90 për qind e kryesisë, e kryetarëve të forumeve dhe elektoratit të LDK-së në 'Kodrën e Trimave' që Z. Beqiri pas këtij rezultati të dobët të reflektojë dhe të lëshojë rrugë për një reformë më të thellë në degën e parë të LDK-së",ka thënë Shefqet Osmani, anëtar i kryesisë në degën e parë në Prishtinë.

Por, Beqiri e ka quajtur absurde një thirrje të tillë, duke thënë se ai ka gjithë mbështetjen e degës.

“Çdo vendim të degës unë e respektoj, por vendim të rrugëve, gjegjësisht të kafes dhe dëshirave të individëve nuk e pranoj. Çdo vendim të degës e pranoj por kjo nuk është as kërkesë e degës, ajo është tërësisht e pa vërtetë”, ka deklaruar Beqiri.

Beqiri ka thënë se pakënaqësitë dhe kërkesat duhet të diskutohen në mbledhjen e kryesisë së degës, të cilën ka paralajmëruar ta thërrasë në fillim të javës së ardhshme.