Pa u bërë 24 orë prej rezultateve të para të zgjedhjeve parlamentare 2021, kryetari i partisë që ka pësuar humbjen më të madhe të votave në këtë garë, ka ofruar dorëheqjen.
Isa Mustafa për rreth 11 vjet kryetar i LDK-së, ka njoftuar këshillin për dorëheqjen e tij dhe ka thënë se kuvendi i partisë do të mblidhet shumë shpejt për të zgjedhur kryetarin e ri.
Pas takimit me këshillin, Mustafa ka thënë se bart përgjegjësi objektive për atë së çfarë ka ndodhur me rezultatin, ani pse nuk ishte pjesë direkte e fushatës.
“Vlerësoj personalisht që rezultati është shumë i keq për LDK dhe një rezultat që nuk e kemi pritur. Vlerësojmë që kandidati Hoti ka bërë një punë të mirë dhe të suksesshme dhe ka prezantuar p[programin qeverisës. Por vota e qytetarëve është ajo që duhet të respektohet dhe shenjë të kësaj vote, dhe për organizim unë sot kam njoftuar kryesinë që do ta thërras kuvendin e LDK për zgjedhjen e kryetarit të ri të LDK-së në periudhë shumë të shpejt kohore. Mendoj që LDK do ta ketë së shpejti kryetarin e ri dhe do të bëjmë të gjitha përgatitjet përmes kryesisë në mënyrë që ky proces të kryhet sa më mirë. Vlerësoj që barti një përgjegjësi për këtë që ka ndodh edhe pse nuk kam qenë në proces të zgjedhjes”, ka thënë Mustafa.
Përveç Mustafës, përgjegjësinë për rënien e PDK-së do ta bartë edhe kryesia e kësaj partie, të cilët po ashtu janë në dorëheqje.
Lutfi Haziri nënkryetar i LDK-së, ka thënë së përgjegjësinë për gjendjen e partisë do ta bartin të gjithë.
“Jemi kryesi në dorëheqje. Tu u marrë me vlerësimet tona. Gjithçka që është në dispozicion të rikthimit të madh e mobilizimit të LDK-së kemi me bat ë pamundshëm. Ne duhet me dhanë përgjegjësi para strukturave tona fillimisht. E vetmja konsideratë është për votuesin. Ata e kanë dhanë ndëshkimin e madh. Unë jam kryetar komune. Së paku këtë e kam të sigurt deri në krishtlindje”, ka pohuar Haziri.
Dy komunat që dikur janë konsideruar si bastione të LDK-së, Istogu e Podujeva nuk ia kanë dhënë po ashtu besimin LDK-së në këto zgjedhje. Numri i votuesve të LDK-së nga këto komuna ka qenë më i vogël se secila palë zgjedhje.
Pas takimit të këshillit të LDK-së, dy nënkryetarët e kësaj partie nga këto qytetet nuk kanë dashur të flasin për përgjegjësinë e tyre në uljen e numrit të votuesve në këto pjesë.
“Ska kandidat ju ka thanë kryetari. Do të shkojmë në Kuvend”, ka deklaruar Agim Veliu.
E nëkryetari tjetër i partisë Haki Rugova, nuk e di të ardhmen e tij në parti.
“A s’folet me Agimin a ? Po po e di që jam nënkryetar po me Agimin?... Jo jo. Po çka do të thotë ajo rezultati është çka është s’ki çka. Është vullnet i votuesve. Do të jem kryetar komune deri në fund të mandatit. Nuk e di a do të jem më. Ajo varet nga partia”, ka thënë Rugova.
Ende nuk dihet se kush nga LDK-ja, ka synime për t’i hyrë garës për kryetar të LDK-së. Lumir Abdixhiku të hënën ka refuzuar të komentojë nëse ka synime të tilla.
“S’kam koment. Faleminderit shumë”, tha ai.
LDK-ja ka pësuar humbjen më të thellë në këto zgjedhje, pasi ka rënë nën 13 për qind. Dikur kjo parti ka qenë kryesorja në vend, ndërsa me zgjedhjet e fundit LDK-ja nuk kryesonte as në komunat të cilat i kishte bastione të saj.
© KOHA. Të gjitha të drejtat janë të rezervuara.
