Shifra të larta të të infektuarve me koronavirus janë shënuar edhe gjatë 24 orëve të fundit në Kosovë. Nga 2 mijë e 856 mostrat e marra, 372 persona kanë rezultuar pozitivë.
E 6 persona kanë vdekur si pasojë e Covid-19, duke e çuar në 1 mijë e 540 numrin e të vdekurve.
Numri i lartë i të infektuarve gjatë ditëve të fundit ka bërë që të rritet edhe numri i rasteve aktive në Kosovë.
Aktualisht në Kosovë janë 7 mijë e 41 raste aktive. Ndërkohë, Prishtina prin për nga numri i të infektuarve, me 156 raste vetëm gjatë 24 orëve të fundit.
E ndonëse dy javë më parë u konfirmuan tri raste të variantit të ri të koronavirusit, Kosova nuk ka të dhëna të tjera nëse ky virus ka vazhduar të përhapet në vendin tonë.
Kjo pasi që IKSHPK nuk ka dërguar më mostra jashtë vendit për detektimin e këtij virusi.
Drejtori i departamentit të Mikrobiologjisë në IKSHPK, Xhevat Jakupi, përmes një përgjigjeje me shkrim ka thënë se ky institucion është duke punuar në ngritjen e kapaciteteve për detektimin e varianteve të reja të SARS COV-2.
“Nuk janë dërguar mostra të tjera jashtë vendit për detektim të variantit të ri. IKSHPK është duke punuar në krijimin e kapaciteteve për detektim të varianteve të reja të SARS-CoV-2 në mesin e mostrave që rezultojnë pozitive. Jemi në fillim të procesit për blerje të kiteve për RT PCR për detektim të varianteve B.1.1.7 (UK) dhe atij B.1.351 (Afrika e Jugut) të SARS-CoV në aparaturën që e kemi në dispozicion. Nuk ka ndonjë indikacion te veçantë klinik që një person është i dyshuar ne infeksion me variantet e reja te virusit. Mënyra e vetme e detektimit të varianteve të SARS-CoV-2 është në laborator me RT PCR testim ose sekuencionim” ka thënë Jakupi.
Sipas tij, ata janë në proces të blerjes së kiteve për detektimin e variantit të ri nga Britania dhe virusit nga Afrika e Jugut.
Më 29 janar të këtij viti, ministri i Shëndetësisë, Armend Zemaj, konfirmoi tri rastet e para me variantin e ri të koronavirusit në vend.
© KOHA. Të gjitha të drejtat janë të rezervuara.
