Në gjysmë i kanë mbetur diskutimet anëtarëve të Lëvizjes Vetëvendosje në mbledhjen e Komisionit Qendror të Zgjedhjeve, këtë të martë.
Kryetarja e KQZ-së, Valdete Daka, lëshoi mbledhjen derisa ishte duke folur anëtari i Vetëvendosje, Alim Rama.
Me largimin e Dakës, u larguan edhe anëtarët e subjekteve të tjera.
Këtij largimi i parapriu një kërkesë e Alim Ramës, i cili edhe në këtë mbledhje, ia përmendi deklaratën e Dakës, dhënë ditë më parë se është personi më i urryer.
DEK: Alim Rama, Anëtar i LVV-së në KQZ
“Ju vetë keni deklaruar se jeni personi më i urryer në Kosovë edhe mu nuk po më duket e arsyeshme që ftesa me ardh nga një person që i ka humbur kredibiliteti në Kosovë”, tha Rama.
“A e keni pyetur ndonjëherë veten pse kam deklaruar”, iu drejtua Daka.
Ndaj largimit të Dakës, reagoi anëtari tjetër i Vetëvendosjes në KQZ, Sami Kurteshi.
“Nëse na pyet neve për çka ne mendojmë që jeni njeri ma i urryer ne themi se ti vetë ke pranuar. Kot mbyllet kështu mbledhjet. Ky është problemi i KQZ-së”, tha Kurteshi.
Paraprakisht, Sekretariati i KQZ-së bëri të ditur se deri të hënën kanë arritur mbi 5 mijë e 500 pako me fletëvotime nga diaspora, derisa edhe të martën pritet ardhja edhe e pakove të tjera.
“Sekretariati parasheh që me datën 14 shkurt, ditën e zgjedhjeve të bëhet transferimi i pakove nga vendi i mbajtjes deri në Qendrën e Numërimit ku do të bëhet edhe vlerësimi i pakove. Pra, zyrtarisht vlerësimi i pakove do të bëhet më 14 shkurt në Qendrën e Numërimit dhe Rezultateve”, deklaroi Burim Ahmetaj, kryesues i Sekretariatit të KQZ-së.
Të martën, KQZ-ja ndër të tjerash ka miratuar edhe 6 mijë e 841 vëzhgues.
© KOHA. Të gjitha të drejtat janë të rezervuara.
