Buka ishte arsyeja për mosmarrëveshjen e cila e dërgoi në vdekje Hatije Dinën, në maj të vitit 2019.
Ilir Haxhiaj, bashkëshorti i saj, i cili u dënua me 15 vjet burgim nga Gjykata në Prizren, në fjalën e tij përfundimtare, kishte treguar se si kishte nisur mosmarrëveshja mes tyre.
“Ditën kritike më ka thirr një shok me dal në kafiq me pi kafe aty në fshat, kemi ndejtur 3 orë, kam shkuar te shtëpia, e ndjera ka qenë në oborr, kam hy brenda dhe kërkova bukë, unë nuk e shifsha as ushqimin as bukën, kur unë e pyeta se a ka nasjen për me hëngër, ajo tha s’ka, shko ku ke qenë deri tash ha te ai. Unë nuk fola asgjë kam shkuar në dhomë nja 5 minuta kam ndenjur në dhomë ajo në oborr folke lloj-lloj fjalë duke thanë s’ka bukë”.
Kështu kishte deklaruar Haxhiaj, duke treguar se më pas e kishte marrë të ndjerën për ta dërguar në Rahovec, te familja e saj dhe se gjatë rrugës e ndjera ishte hedhur vetë nga vetura dhe se ai nuk kishte ushtruar dhunë mbi të.
Por, të kundërtën e tregojnë të gjitha raportet mjekësore e fotografitë. Sipas raportit të obduksionit, vdekja, e tani të ndjerës, ka ardhur si rrjedhojë e gjakderdhjes masive, gjakderdhjeve të shumta në indin trunor, të shoqëruara me thyerje të kafkës.
Në këtë raport thuhet se këto janë dëmtime të shkaktuara nga trauma e shumëfishtë dhe kanë qenë të shkaktuara si pasojë e përplasjes së trupit në sipërfaqe të forta, e që nuk përjashtohet mundësia që tani e ndjera të ketë rënë nga vetura që ishte në lëvizje.
Të padrejtë e absurd e ka quajtur edhe djali i viktimës, vendimin e Gjykatës Themelore të Prizrenit, i cili për herë të parë kishte rrëfyer në KTV, për dhunën e vazhdueshme që e ndjera kishte pasur.
“Vendimi i gjykatës është vendim i padrejtë pasi i njëjti ka kryer veprën penale vrasje e jo lëndim i padrejtë, kjo është absurde dhe e padrejtë, si familjar jam i pakënaqur me kualifikimin e veprës penale”, ka thwnw A.H., djali i viktimës.
E përveç familjarëve, dënimin që Gjykata Themelore shqiptoi për Ilir Haxhiajn e ka kundërshtuar edhe shoqëria civile.
Me anë të një proteste para Gjykatës, aktiviste të të drejtave të grave kanë shprehur pakënaqësitë me këtë aktvendim.
“Shteti vazhdon t’i neglizhojë jetët e tyre pikërisht pse ato janë gra. Ky rast është edhe një rast tjetër i femicidit, andaj ne nuk mund ta lexojmë ndryshe përveçse një dhunë të institucionalizuar ndaj grave, e cila përveç që po i lë gratë të varfëruara po ua vjedh të drejtën themelore për jetë”, ka deklaruar Liridona Sijarina.
Pas një viti e gjysmë që nga vdekja e Hatije Dinës, Gjykata Themelore e Prizrenit më 3 shkurt të këtij viti dënoi me 15 vjet burgim Ilir Haxhiajn për veprën penale “Lëndim i rëndë trupor”, ndonëse disa herë është kërkuar nga avokati i familjes që i njëjti të akuzohet për “vrasje”.
© KOHA. Të gjitha të drejtat janë të rezervuara.
